Ka Tawngtai chhanna

Midang tan thil ho tak nimahse ka tan erawh zawng a ho mawlh lo. Midangte chhiar atan phei chuan ka sit rum rum mai. Thil chhuan awm tak a niloa, han tarlan kher tlak pawh a ni hauh lo. Mahse mamawh laia min chhang thintu Pathian thiltih a nih vanga he thu ziak hi ka ni. A hmangaihna leh a dawhtheih zia te sawi dawn ila, mihring tan hian THIL THEIH LOH a ni. Thil tam tak, kei misual dilna chawplehchilh a, min chhanna hi tam tak a awm a, mahse tunah chuan pahnih khat lek ka han tarlang teh ang.

Vawikhat Palika Bazaar, Connough Place ah keimah chauhin Computer parts thil eng eng emaw lei turin ka chhuak a, ka duh tlem azawng ka lei fel hnu chuan haw lam ka rilruk taa, mahse ka riltam deuh avangin thil eng emaw, coffee leh chhang eng emaw tal ka ei teh ang, tiin dawr lam ka pana, ka Wallet ka phawrh ang ka tih chuan, a lo awm ta reng reng lo mai. Ka buai zia kha aw!! A chhungah chuan pawisa tam em em lo mahse ka Card thenkhat leh ID te ka dah tel avangin ka ui hle, a thar awlsam tea siam theih anilo chuan min ti lungngai zual.  Thiante leh unau te koh na atan chuan a hla tham angreng sia...

Pathian bak ka rilru ah a lang lo, vawi tam ka dilna hi chawplehchilh hian a lo thleng thin a, tun tumah pawh hian min chhan leh ngei ka ring. ka rilru in ka tawngtai a, ka ngen a, lawmthu ka sawi bawka, a hnuah 'intum chawp Pathian a ni alawm' tiin Metro Station lam chu ka pan thla ta a. Ticket lakna tur tak ngial pawh ka nei ta lo. Zah theih ani tawh lo, engpawh nise tiin, college kal niawm tak, vai pahnih lo thu hnehah chuan ti hian ka zawt ta hlawl a, "Hei, thian te u, ka bazaar zo haw ka tum laiin ka Wallet ka ti bo/ nge min ruk sak hlauh a, in thlenna tur pawisa ka nei der lo mai, khawngaih in min tanpui teh u" tiin ka va ngen chawt a, "hei tuna ka sana bunlai hi a man to lem lo mahse, la ula, hawnna tur deuh chiah ka mamawh a," tiin. An lo fel khawp mai, chanchin kimchang zawk a kan inbiak hnu chuan, 'Lak kher a ngai love, ticket chu kan laksak mai ang che, lungngai duh suh' tiin chhanna ka dawng tlat mai, ka van lawm teh reng em. Pathian remruat dan hi chu a va mak thin em! kan mamawh chauh chhang lova, kan duh leh kan awh thleng a min chhang thin tu, hmangaihna tawp thei lova min hmangaihtu Isua Krista hming chu fakin awm rawh se.

Kum 2008 kha nitain ka hria, hnathawh nan leh College kal nan tiin Karizma Bike hi kan lei vea, kan Bike lei hmasak berna a nia, a lian in, ka zo tha lo hle. Vawikhat tlai lam chawhmeh lei teh ang tih pahin ka khalh chhuak ve a, khua a chhiat bakah a diak in, a nal khawp mai a. Ka haw lam chuan kawngsir a, side drain an siam ah chuan laklawh tawkin motor dang nen kan intawk a, ka tang taa, ka khup thleng chirhdiak ah ka tanga, ka buai zia kha aw!! A ding mai mai lai lah, kan nawr tha thei tawk tawk a ni sia (ka hman ngai loh vang; ka thiam chian hnu chuan rit ka ti lo) Minute 15 vel chu mahniin nawr chhuah tumin ka beia, a hahthlak ngei mai, Vai hoin min en thup a, hah leh chauh nen a thinrim thlak duh ngei mai, tumah lah chuan min puih an tum der silo (Vairam ni miau hek). Rilru bawkin ka tawngtai a, tawi mahse ka thutak khawp mai. A rei lo, minute 2 hnu velah chuan ka Mizo pui ngei pahnih an lo kal a, ka van lawm tehreng em!!! Ka hriat ngai anni lova, min hre bik chuang lo. Reilo teah chuan kan nawrchhuak a, kan berh pheng phung a, thildang ka ngaihtuah tawh lo, ka rilru in lawmthu ka sawi mawlh mawlh mai ani.

Kan tawngtai reng reng hi Pathian hian chhan loh anei ngai lo. A mi chhanna chu:

1. Aw: Pathian hian kan thildil leh ngenna hi vawlehkhat ah min chhan nghal leh tihhlawhtlinsak a awm thin.

2. Aih: Pathian hian kan thil duh leh engkim hi a hria a, a remruat vek bawk ani. keimahni tana tha lo tur leh kan thil duh ringawt leh kan duh zawng zawng hi a tul a tilo. Mihringin kan duh zawng zawng leh kan dil ang zawng zawng hi chhan nita se, engthil nge lo thleng ang? kan hria. Min chhanglo ngai lo, a mi chhanna chu, tun atan chuan ka fapa, ka fanu, a tul lo, tih ani, min chhanglo ngai lo.

3. Nakinah: Engkim siamtu leh ruattu Pathian hian engkim hi mumal takin a siama, a duanga, min enkawl thin ani. Kan thildil leh kan mamawh zawng zawng hretu a ni. Kan tana tha leh tha lo tur, a hun leh hun lo te engkim min buatsaih sak vek ani. Kan thil dil te kan mamawhna kan thlen te hi, tunah nilovin, nakina min chhan ah a dah ani. Lalpa remruatna te hi mihring hriat phak leh ngaihthlak phak ani lo.

Tlai ngailo Pathian a ni. Mihring in rem kan ruat thin te hi, Isua-ah lo chuan engmah lo mai mai alo ni. Amah chu ringla, aman engkim ati vek ang. Ringhlel suh la, Nili (4) pawh liam mahse tlai ngailo Pathian a ni.

Read more »

Eng hi nge Hmangaihna chu?

He khawvel ah hian mi tam tak hmangaihna zawngin an lo tlan tawh thin a, an lo la tlan lehzel bawk ang. He khawvel hlimna leh lawmna reilote hi hmangaihna emaw tiin mi tam tak chuan a parzu an lo tlan thin a. nimahse chutiang ho chuan lungbang an su a, kir leh turin chakna reng annei tawh silo. Chutiang chu kan ni ve ang tih ka hlau ani.

Hmangaihna awmzia hi i nghaihtuah ngai em? Kei chuan keima phak tawk tein a awmzia hre lo mah ila, hmangaihna in a nghawng chu tlem hre pha ve viai viai in ka inhria asin.

Nula leh tlangval an in ngaizawnga, an in hmangaih em em a, nimahse an chhungten an induh pui silo. A tawp atawp ah chuan inthenna tur kawl alo eng ta, nula chu a chhungten a duhlo chung chung pasal dang nei turin tirh liam an tum ta a, tlangval chu a rilru a na em em a, nula pawhin inruk chu a hnial lo, nimahsela, tlangval chuan ngun takin a ngaihtuah a, puitling takin thil a tia, hreawm ti em em chung leh mittui hial tla in a hmangaih em em chu, a hlimna tur a nih zawk phawt chuan tiin inthenna a hlan ta zawk a, a hmangaih a, Hmangiahna anilo kan ti thei dawn em ni?

Nula in a duh lo em em a, tlangval lah chuan a duh bur si; ka neih dawn loh che ai chuan ka tichhe tal ang che, midang i neih ka phal lul lo che. Ka tello chuan in tluang chuang lovang tiin a in hrosa a, Hmangaihna anilo kan ti thei dawn em ni?

Mi tam tak chuan inngaihzawnna leh hmangaihna hi thuhmun emaw an ti fo  thin, anilo asin. In hmangaih lo chung pawhin tam tak chu kan in ngaizawng ani lawm ni? Inngaihzawnna hi hmangaihna ani lova, kawng thenkhat ah chuan inhmangaihna avang chauhin in ngaihzawnna a awm chauh zawk ani.

Hmelthat vanga in ngaizawn chuan rei a daih ngai lova, hmel a chuai hunah Hmangaihna kan tih pawh chu a ral chawpchilh leh nghal mai thin. I bailpa/ bialnu hmeltha i tih em em kha accident vangin a hmai kha sawi bei bui leh chhe ven vun leh tawih hem huam in lo awm ta se, i hmangaih reng thei angem?

Kan pi leh pu ten hringnun hi mai lum ang an lo tih hi a dik khawp mai. Chan that lai kan nei a, chan chhiat lai kan nei bawk. Kan hringnun hi a in lumlet renga, kan duh angin thil a kal vek thei lo. Chutiang bawkin Sum avangin in hmangaih ta ila, sum awm lovin chhuan han chham ta ila, Tapchhak a meialh ringawt en tur ni tase, kan in hmangaih reng thei ngut  ang emaw? Sum avanga in hmangaih ni ta ila, sum a ral rual rual in hmangaihna pawh a ral ve nghal mai thin.

Mizia leh nungchang avanga inngaihzawnna pawh inhne hun leh in ngei hun a awm lo thei lo, rei a daih chuang lo. Hmangaihna avanga in hmangaihna erawh chuan dam chhung a daih thin. 

A nih leh hmangaihna kan tih chu eng nge nita ang? eng nge ni inngaihzawnna hi hmangaihna a nih siloh chuan eng ber hi nge inngaihzawnna pawh chu ni ta ang le?

Read more »

Engvang nge?

A chang hian engvang nge aw? he khawvel anchhedawng-ah hian ka lo pian ve le aw! ka ti thin. Sual sain kan pianga, sual nei reng chung bawkin he khawvel hi kan chhuahsan thin. Nu chhul atanga kan lo pian thlakin, itsikna kan nei nghala, hmangaihna pawh kan hrethiam nghal thin. Chhia leh tha hriat hma hauhin 'chan' kan hlau a, ani, ngaihsak hlawh duhna thinlung kan neih nghal ni.

Engmah nei lovin kan pianga, chu chuan neih ve duhna thinlung min puttir a; ani, chumi neih ngei tum chuan kan hmanhleh thin. A nei loin neih an duha, tam tak nei pawh in neihbelh zel an duh thin. Mihring te hian chin tawk kan hre lo. Duhin chin tawk anei lova, chu chu kan tlakchhiat pui thin. Amaherawhchu sim ahnekin kan thlahlel ber ani lawi si.

Siamtun mihring hi chhia leh tha hriatna hmangin kalkawng pahnih min siam sak a, chu chuan kan nun a kaihruai thin. Chhia leh tha, thinchhia leh zaidawm, nunrawng leh thinnel - engkim hmai hnih nei a siam kan ni. He khawvel, rilru leh thlarau, taksa indona leh in ui leh ar naah hian a chak chak dinchanna a ni tih hriate chu an dingchanga, Ro an rel thin. A ruh no no chhuak ah tih ang chiah in, chak leh remhria, thil tithei te an dingchang a, engmah lo nite chu tu ma hriatpui lovin an zuih ral thin.

Pian hun kan neia, than hun, vanglai hun kan neia, zuihral hun kan neia, thih hun kan nei thin. Hemi hrechianga, theihtawpa tan laa, dikna leh huaisenna hmang thiam chu he khawvel an kalsan hunah pawh, an nihna leh an hming chu zuih ral ve mai lovin par a chhuang zawk thin.

Kan pian chhan kan hriat a, kan nihna, kan theihna, kan finna, keimah, keimahni kan nihna midang te tana kan hmanthiam phawt chuan, miten min chhiar hunah hlawkna eng emaw tal an chharchhuak ngei ang. He khawvel ah hian thiltha tih kan nei tawh reng em? ka thih hunah, tunge tap anga, engtiang chiah in nge min vui ang. He khawvel hi lemchanna ania, a dawhsan ah/ stage ah kan ding meka, lem chang mek kan ni; hmuhnawm kan nih leh nih loh, en tlak kan ni ngei em? tih chu keimahni mimal tin nun theuh atangin a intan a ni. A tawpna erawh midang ten hnukhar in ngaihdan leh thutlukna an siam thin a ni. Nang hmuhnawm i ni em? nge lemchang thiam satliah mai mai i ni zawk?

Read more »

Mobile Themes siam dan!

Mobile themes hi chu kan hre vek ang, mahse engtin nge mahni duh dana awlsam te siam dan erawh kan hre vek kher lo mai thei. A software chu a awm ngei ang ka ring, mahse hetah, online atang hian siam a awl in, option a tam mai bak ah, duhthlanna zau tak min siamsak tel bawk a ni.

Hetah hian i lut anga, i duh zawng chu i siam thei mai tawh e. Tutorial ang deuh in vawikhat ka siam dan hetiang hian a ni e.

1. I mobile (model) thlang hmasa ber la

2. A default chu hetiang ang hian ani a,

 3. A hnuaia a landan ang khian, option chi hrang hrang, engtirnan,  a wallpaper tur, a background tur, etc kha i computer a mi kha, i upload anga, (nangmah thlalak ngei emaw, net atanga i download emaw, eng ang thlalak pawh).

4. Han ziahbelh vak pawh ngai tawh lo niin ka hria. A themes ka siam ve hi lo en duh leh lo test chhin duh tan tlem azawng ka dah ve a, mahse a theih kher lo mai thei. Mobile site atanga download dan pangai-in ka upload hman silo a, remchang hmasa ber ah tih chhuah ka rawn tum dawn nia.

5. A screenshot leh background then khat,...

6. Tech Savvy emaw beginner emaw, tu emaw tal in kan tangkaipui anih chuan ka kut hah man ah ka lawm e, tih ka duh tawk. Hahahaha :)

Ka lawm e

Read more »

A vawikhat na!

      Ka hmaah chuan lehkhabu chhiar tur chu a inchhawp hnawk nuaih maia, kum tawp lam a nih tawh avangin lehkha chhiar nasat a ngai tawh hle, duh anga lehkha ka la chhiar loh avangin tha deuh taka zir ka tum tawh a, ka shawl bah lai chu tha deuh taka bah pah chuan phek 2,3 vel chu ka han chhiar thuak thuak a, mahse rilru ah a lut thei thawt lo a ni. Ka taksa chu Delhi khawpui ah awm mahse ka rilru chu hmun hla tak ah a cheng veng veng si. Ka ngaihtuah lovang ti mahila, ka dawhkana Mawitei nen inkuah riala, kan thlalak, uluk taka Frame-a ka tar chu kan bihnawn leh hrama, ka rilru ah a thar lo thei lo. Ka lehkha chhiar lai chu khupin ka suangtuahna khawvel-ah chuan ka cheng ta zawk a

      Khami ni kher kha chu ka la hrechiang ngang mai, thianpa Mabiaka nen kan Badminton khel zo, haw lampang a kan chawlhna ziah thin Restaurant ah chuan kan lut leh a, a nghaktute nen pawh kan inhmuh ngun tawh em avangin, tha takin min lo biaa, mi an tam lo hle. Kawngka bul sirah chuan nu pakhat leh a fanu Bazaar haw niawm tak hi thingpui an lo in duna, a hnunglamah chuan nula pathum chhiat loh hmel deuh deuh hi an lo thu a, an incheina atang chuan mi awmthei leh mi hausa fanu an ni tih chu a hriat hle. An thutna ep chiah ah chuan thutna kan rem ve a, kan thil chah tlema a rei deuh kan rin avang chuan kan Badminton khelh chungchang chu kan sawi dun a.

      Chutia kan sawidun lai chuan kan piah deuh lawka thu nula pathum chu ka va en pheia, chutah tak chuan alawm, ka damchhunga ka theihnghilh theih tawh lo thil ka tawn tak chu!! Ka hmalam hawi zawnga thu ve pakhat chuan min lo en phei ve reng niin, ka en thuak atang chuan khawvela ka hmeichhe hmuh tawha, tha ber, ani hial awm e. Ka melh phei ve tih a hriat chuan a mit chu a la sawn vata. Kan thil sawidun lai chu ka rilru ah a lut tawh lo reng reng, a hmel chu ka han ena, ka en nawn leh a, a va tha tehreng em! Ka thinphu a dik tawh lo, chutah ani pawh chu a lo hawi phei leh zeuh a, ka la en reng tih a hriat chuan a mit chu a la sawn vat a, a zak chu a sen tan tan a, mahse tha ka ti telh telh si.

      Mabiak'an ka ke min chhuih lai chuan ka phu zawk a, “Hey, tha awm ve a, ka thusawi chu i hria em?” tiin awmze nei fe hian a rawn tia, engkim chu a lo man thiam vek niin. A chang chuan Mabiaka nungchang hi awh chang ka nei thin, hmeichhia han biangbiak vel a thiam si, hmeltha vak lo mahse, a zei vang hrim hrim ani pakhat ang chu, nula hmeltha tak tak hi a thing leh nawlh thin.

      Kan thil chah pawh chu a lo thleng tawh a, mahse kan thil ei lai pawh chu ka rilru ah a awm lo, min lo melh ve angem tih ringawt ka ngaihtuah a, mahse mipa nge nge tiin fork chuan chau chu ka han chawi kanga, ka han ang, nidang aiin a sei thanin kan hre pek a, ka ei tur chiah chu min lo melh ve reng hian ka hria a, ka mitsir in ka han melh phei leh hrama, ka rin lawk leh ka hlauh ang ngeiin min lo melh ve reng niin, ka zak..

      Mabiaka chu a nui tet tet a, uhmm!! Chuti teh fo chu khawnge ka va bia nge, lo thu rawh tih pah chuan a tho hluai a, ‘kal suh’ tih hman ani lo, hmeichhe lam pan chuan a phei nghal a, keimah min rawn kawh pah chuan a thiante a va bekbawr sar sar chu ka mitsir chuan ka va hmu theia, engtin tak ti ang maw? tia ka ngaihtuah lai chuan Mabiak-a chuan a kutin min rawn hui pheia, a tirhah chuan kal ka tum lem lo. Mahse, anmahni zawk in min auh phei takah chuan an bulah chuan ka thu a ni ve ta reng mai.

      Khami tum khan eng nge ka tih a, eng nge ka sawi ka hre reng ta lo. Ka zak a, ka thil sawitur ka haihchham/ baihvaia, nuam ti em em chung siin, ka inthlahrunga, an bulah awm ka thlahleh bawk si. Kan mit leh kan mit a in tawn tak zauh zauh hnu chuan amah pawh a zak em em a, sawi tur a haihchham ve tho tih ka hre taa. A thiante chuan kan awmdan chu an man rang thiam kher mai; chhuanlam chhete siamin a hnu rei vak lovah chuan an chhuak ta diala. Kan pahnih chauh kan ni ta, sawi tur a vang kher mai. Bul han tanna mai tur avang sia, ‘I zak ve tho ami’ ka han tiringawt a, min chhang lo, a rawn hawi chhuah pah chuan a khi deuh sen sen a, keimah zawk ka zak telh telh a, sawi tur avang takzet ani. A tawp a tawp ah chuan mipa nge nge tiin a hming ka han zawt ta a, ‘mawite tiin min ko thin’ tiin mi rawn chhanglet ve taa,…

Nov 2006

Read more »

A tha ve riau!

He Website hi Internet kawngsira ka chhar a nia, a tha reuh riau mai, mahni chauh a hriat-ah chuan ka ui ve sia, thlalak editing lam tui tan leh tui vak lo tan pawha awlsam tea, nalh taka in chhuah dan ani mai, ka sawifiah thiam vak lo. Mi te angin  Photoshop, Corel draw, leh eng eng emaw zir sang kan ni ve bawk silo. ka rawn share ve che u ani e. Thlalak tlem azawng, ka siam pawh ka han tarlang tel nghal e,..

Han Edit kual vak ngailo hian, i thlalak kha i upload anga, i duh ang zawngin i Select naah khan a lo lang mai dawn a ni.



Thlalak post ka siam hmasak ber a nie, tlawh ve ngei ngei chi a nie, option a tam khawp mai.
I intithei in hmain tawk mai se, hei lo dang pawh tha tak a awm,.. Engangin han nih tum ve mah ila, kaha se ani ringawt, milar leh mite ngaihsan nih hi. Lung ngai duh lem suh! hei awlsam te-a Celebrity nih theihna kawng khat, kawngkhat chiah a awm, chu chu helai ah hian a ni e, hahaha
                                                         





















                                                              TREK TREK TLEM

      PDF hi thuziah leh eng eng emaw ah leh Office thil ah hian a tangkai thei viau thin a. Entirnan, Ms Office ah thu kan han ziak a, a thenin Ms Office 2003 la hmang duh tlat kan awm laiin, 2007 emaw 2010 emaw hmang kan awm bawk a, Computer danga han hman hian a format, size leh layout te hi edit leh fe an ngai thin a, thenkhat ah Adobe reader leh a dang dang neilo te kan awm thin avang hian Internet atanga awlsam te hman mai theih dan tlem azawng han sawi ila. Hemi email ah hian pdf@koolwire.com i thil thawn duh chu a Attachment ang in thawn la, reilo teah i file duh kha awlsam takin PDF ah a rawn in convert anga, a zo. 

       Tin PDF (han sawi zawm mai ila) file ah tho hian, software dang dang leh, online leh internet hmang lova, awlsam te a siam dan a awm bawk.  Office 2007 emaw 2010 emaw hmang tur-ah han in beisei leh ila, i thil data, project, a eng emaw ber pawh nise, 'save as' ah khan kal la, option chi hrang hrang a lo awm ang. Khami zing ami pdf tih kha click keuh mai rawh, a zo leh ta!

Ka lawm e

Read more »

Blog-a Favicon dah dan

Eng nge ni Favicon chu? Favicon chu ‘favorite icon’ tihna mai a nia, Bookmark list, leh browser kil sira, kan duh thlalak emaw icon emaw lo lang hi a ni maia, Avatar nen inang chiah lo mahse, an inzul hle. 16 pixels by 16 pixels icon - a ni tur ania, file extension chu .ico (eg: word document chu .docx; thlalak chu .png) a ni bawk tur ani. He website atang hian awlsam tein a siam theih, http://www.iconj.com/favicon_hosting.php atang hian. 

A hnuai ami ang hi favicon chu a ni e. 

1. A chunga ka sawi tak ang hian i picture chu upload la, i generate anga, chuan desktop ah download/ save rawh. 

2.A link pawh kha save a ngai ang, hetiang hian,

3. I blog Dashboard ah khan i kal dawn nia, hetiang hian

4. Edit HTML ah khan kal la, hei hi i zawng dawn nia. a awlsam nan (ctrl+f)

<head>and</head>tags. A hnua ami ang hian i copy anga, </head> chung chiah ah i paste dawn nia. Amaherawh chu; (" ") chhung zel ami hi edit angai tihna a ni, eg. a pek dan atang hian. A awlsam dan ber chu , i generate tawh a link kha copy paste mai rawh.

<link rel="shortcut icon" href="/favicon.ico" type="image/x-icon" />

5. Ti chuan Save Template la, a zo a ni mai. I blog kha han hawng la, hetiang ang hian a lo lang tawh ang

 

ka lawm e!

Read more »

Fake Document siam dan!

Ka ziak angem aw? tiin vawi tam ka ngaihtuaha, thlohpui rorel ang chiah nilo mahse, vawi tam ka ngaihtuah a, ka ngam chiah lo. Thil hote nimahse, a hlauhawm tih ka hria a, Sawrkar hna leh eng eng emaw-ah hman phei chuan Jail tan ka duh miah lo ania, ka hmingte in lo sawi reu reu anga, hahaha (fiamthu) Heta ka ziah hi a taka hmanga buaina a awm chuan a mawh erawh ka phur lovang. Hriat ve mai mai tur atana ka ziah a nia, a duh chuan lo hmang ve mai ula, hna tenau leh eng eng maw thil a mamawhna a awm chuan a tangkai ve thin tho. Mahse Fake document hman hi a zahthlak a, tin, a changkang lo bawk. Eng ang Certificate tha pawh nei ila, keimahni kan qualify chuan loh chuan engmah a nilo. Tin, a hmaa ka tarlan tawh ang khan MS Office hi ka la zir chin loa, a mawl dan ang angin, hriat awlsam nan han sawi ila,.. A tawpa a landan tur chu hei,...  

Tun atan chuan Education marksheet-a watermark (a icon/image) dah dan awlsamte sawi ila, Ms office 2010 atang sawi mai ang, a tam zawk chuan kan hman tho ka ring, 2007 nen a inthlau lem lo niin ka hria.

1. Open la, ms word chu (hahaha). Page layout chu i duh dan hmang mai la, mahse Landscape hi marksheet atan chuan a tha. 

2. Page layout ah  khan kal la, watermark option a awm ang, Custom Watermark kha click rawh.

3. Picture watermark ah khan kal leh la, select picture ah kal rawh. I desktop a icon (i save tur-ah ngai ang) kha select la, Scale leh washout kha chu nangma duh dan angin ni mai se. A colour pawh siam thiam turah in ngai ila (eg: a hring) a zo der, pakhat phawt. Hetiang hian alo lang ang. Engkim i chhu thei tawh, a khawi ah pawh. 

Marksheet-a watermark (a text) siam dan, a buaithlak deuh naa, ka thiam ve dan ani, lols

1. A hmaa sawi ang khian watermark option ah khan, text watermark kha thlang la,

2. Text tih-ah khan, hei hi type la, UNIVERSITY OF HO MAI MAI COLLEGE, (a eng pawh)

3. A kar awl ah space pahnih zel hmang in copy paste phei teuh rawh

4. Size, colour, font kha i duh dan hmang mai la, mahse, Horizontal tih erawh theihnghilh suh.

5. A hnuai-a image ang hian a watermark kha a lai (middle) ah a awm ang

6. Windows 7 hmang turah inngai leh phawt ila, a word lai tak kha, capture/ screenshot la, (shortcut- wins+s), a theih loh anih chuan, Ms OneNote kha hawng la, a theih tawh ang.(a awlsam ber)

7. I capture lak kha, onenote atang khan copy la, Office ah khan paste thla teuh mai rawh, lo arrange la, hetiang hian.

8. I ms word kha langkim thei vekin siam la, chuan a page, i siam zawh kha a screen capture leh rawh.

9. Save la, chuan a tihdan pakhat-na, a hmasa lam ang hian i image siam zawh chiah kha, watermark pangai ang in i file ah khan watermark keuh leh la,a lo lang tawh eng. hetiang hian.

10. Siam neuh neuh chuan a chungber ami ang khian a lo chhuak mai ang,lolzzzz

A pahnih hian page khat-ah a hman theih a, double print out tawh mai tur. A hmasa zawk leh hnung zawk erawh i thu ani tawh. Mahse, hei bak-ah hian Seal leh Stamp siam ngai erawh ala awm. Dawr pangai-ah Govt seal tak tak chu Bribe pawh ni ila, siam a har mai thei a, Photoshop, Pagemaker tello pawhin awlsam takin ms office atang hian a siam theih bawk. Hei lo neuh neuh dangte pawh a awma, chu erawh ni dangah ni mai se,.

Ka lawm e!

Read more »

First time in Beer Party

Christmas vuakvet lai khan keini thianzaho hi ‘Taksa chetna thlarau’ kan han dawng nasa khawpa, kan hlim khawp maia, chu chetna thlarau chuan lamtual zawl thlengin min han hnuk chhuak a, ka taksa chet vawikhatna ani si, a nuam angreng phian nain, a hrilhhai thlak phian. Mahse chu chetna thlarau chu “Thlarau thianghlim” erawh a ni hauh lo tih erawh chiang takin kan hria. 

Party-a ka vawikhat kalna tur a nia, ka hlim rual rual in ka huphurh angreng, a chhanchu vawikhat mah ka la kal ngai silo, ka zak mai ang tih ka hlau a ni. Mahse, vawikhat pian man-ah reng reng tiin ‘aw’ ka ti ve ta a ni kha.

Vawikhat ka chhass-te lam hi ka hmu tawha, a thiam angreng phiana, lampuite hi a ngai ve awm sia ka ti rauh rauh a. A hmun kan han theng chu Music hi a lo ri dup dup tawh a, a chhung kan han lut chu boruak hi a tang nghal at mai a, a then chu a kawp te te hian an lo su deuh hliau hliau mai a. ka thiante chu luh rualin an han su nghal thei mai a, Beer party an han ti ve tak naa, Beer pangai chauh nilo tam tak a lo awm a, hmeichhia ho pawhin a aia sang tak tak hi an lo dawn far mai.

‘Eheu!!’ ka tia, ka rin lawk ang ngeiin ka zak titih tan ta. Tlem tal kai loh chuan engmah ka ang dawn lo tih ka hria. Kan luh hnu atanga rei vak loah chuan ka thiannu pakhat hian, ‘nang hi ka lampui chak riau che, i zei phian ang, lo kal rawh lam dun ang’ a rawn tia, ka chhass-te ka han mitsira, ka lam ngai lo tih hrereng chungin, a lo khi var var a, ‘lampui rawh’ a lo ti vara. ‘Lo kal rawh’ tih pah chuan ka banah chan a kai titih maia, 'ka thiam lo, ka lam ngai lo...'  pawh ka tih zawh hma chuan ‘ka awihlo, lo kal rawh, lampui ve chak che alom’ tih pah chuan tih takte hian min pawta, kei lah zak lutuk tih hre rengin tih tak te hian ka lo tang ve nasa. A tawpah chuan a mah zawk a zak ang tih ka hlauh avangin a laiah tak chuan kan han in kai chhuak a. Music lah chu a ri dem dem mai a, chu mi rem chuan an taksa leh an ke chu an sawi ani tih ka mitsir chuan chiang takin ka hmu theia. Ka thiannu chuan a taksa chu a shake tan ta, a zei hle a, zei tak a ni. Ka chhuak ve laklawh tawh si, lam ve a ngai si, ka taksa chu kan ti che ve dawna, a khawng tulh hian ka hriaa, ka shake ve thei der lo. Eng ka ang dawn lo tlat mai,.. ka lam thiam lo tak tak tih a han hriat chuan min han pawm deuh ti tiha, ka tihdan ang hian lo ti ve rawh a tia, ka han ti dawn, ka thei ve der lo. Ka awmdan chu a ing euh euh ni ber hian ka hria. A kawngah ka kut pahnih chu ka han dah ve ringawta, ka taksa chu a sir tawn tawn hian athle ve mai mai ni berin ka hria.

Khami zan Party kal kan ni ve sia, ka lo lam thiam reng reng lo kha a lo zahthlak. TV velah hi chuan an lam hi ka hmu ve fo, khami zan nula pawh ka lampui thei lo kha aw….ka zak lutuk a, kha tih hun lai nana kha chuan, khu ral thei chu ni ila chuan ka khu ral chem chem thei hial ang. A hnuah keimahin english hla ka play a, lam kan zir leh hnuhnawh a nih kha, a sira han thlek tawn vel mai mai kha chu, chuti em em in a lo har lem lo. Chuvangin tlem kai deuh hlek loh pawhin Party naah hian a lo lam theih ani tih ka hre ve taa. Nang i ni ve emaw?

(NB: He article hi 2006 Delhi ka thlen thlak hmasa ber a ka thil tawn ni ta in ka hria, ka document leh diary hlui vel ka hai na a ka hmuh, ka han share ve che u a ni. Thil chhuanawm lo tak ni mahse a hun lai kha chuan a nuam ve reuh em a, Pub, Bar, Discotheque tih vel hi ka lawm lem lo, nang eng nge ni, i experience lam te?)

Read more »

LEADERSHIP - (HRUAITU NIHNA) II- NA

(A chhunzawmna)

HRUAITU NIHNA DINHMUN DIK TAK

     Hruaitu chhungril leh nihna nun diktak chu chhiahhlawh dinhmuna din hi a ni. Mipuite thatna tur leh lungawina tura mi inhmang zo hreh lo leh midangte itsikna nei lo a ni. Tin, hruaitu tha chuan thuneihna a pumbilh vek mai lova, midangte tan zalenna kawng a hawn sak thin in, a hnuaia mite thil titheia siama, chak taka hma lak a tul a ni tih a hrechiang bawk thin.

    Hruaitu dik tak leh chhawr nahawm ber chu hruaitu nih thlahleh lo, mahse chung lam Thlarau Thianghlimin loh theih lova hruaitu atana a hlankai te an ni. Paula hun lai atanga tun hun thleng hian rilru leh thinlung takzeta an dinhmun luah peih lo mihring Lalpa’n chanvo a pe ngai lo. Hruaitu nih thlahlel te hi hruaitu atan an tlak (Qualified) lova, hruaitu dik tak chu a inphahhniam a, a inpumpek a, tin, Thlarau in hruaitu dang a thlan chhuah pawhin itsik mai lovin a zui mai hreh lo.  

THUNEIHNA HMAN SUALNA KAWNG

(I) Thuneihna kan han chan ruala rilrua lo lut ve awl tak pakhat chu Pawimawh fal bik riaua inhriatna hi a ni. Kan tellova thil kal thei lo tura kan ngaihtuah tawh chinah chuan kan dai pelh tan tawh a ni. Kohhran hi hruaitute rem chhoh a ni lova, Lal Isua-a rem chhoh a ni zawk.

(II) Thuneihna kan chan tam poh leh mi dangte thu leh hla ngaihnepna a piang duh hle. Midang ten thil an zawhfiah changte leh ngaihdan an sawichhuah changte hian hruaitu thenkhat chuan an ngaithei lo mai thin. Hruaitu ni mah ila, kan dik lo theia, midangte an dik zawk thei ve fo tih hriat reng tur a ni.

(III) Thlemna awm ve fo thin chu, thuneihna hmanga mimal hlawkna sual chhuah tumna hi a ni. Politician ten an mipuite chu Lalthutthleng hlangkaitu atan chauh a duh tur a ni lo ang bawk hian Pastor-te pawhin a Kohhrante chu mimal intihlarna hmanrua atan hman a ching tur a ni lo.

(IV) Thenkhat mahni aia hruaitu tha zawk chher chhuah hreh tlat an awm thin. Hruaitu hlawhtlinna chu mipuiteah a in nghata, chuvangin ngaihthah chi anni lo. Thuneihna hman diklohna ah chuan mipuite ngaihthahna a thleng fo thin. Mahse chutiang chu chhe takin an tawp duh hle a ni tih hriat reng a tha a ni.

(V) Inawpbehna hi thuneihna hmang dik lo tute kalkawng pakhat a ni. Kohhran chhungah chuan chutiang chu ni chiah lo mahse, hlemhletna chi hrang hrang a inawpbehhna a thleng ve fo thin a ni. Thiam taka lam tang zawnga Committee Control tum tlat te, hlemhle taka midang ngaihdan leh Dan upbehte a awm ve fo a ni.

HRUAITU TLAKCHHIATNA LEH TLAKHAWLHNA

         Hruaitu ti hmelhem-a chhawr theih tawh reng reng lova siamtu tam ber chu Mipat hmeichhiatna kawnga dai pelhna hi a ni. Sum leh pai duhamna avanga mualpho let der, kohhran hruaitu zingah pawh an tam tawh hle a ni. Sum leh paia mi rinawm lo chu thlarau nun kawng hruaitu (Spiritual leader) ah mitten an pawm tak tak thei lo. Tangka sum ngainatna hi sual tinreng bul a ni sia. Tin, hruaitu dihmuna mi a han din chhuah chiah hian chapona a thleng ve nghal thin a ni. Hruaitu, mi ngaihsan hlawh tak tak, tlakhawlhna lian ber chu engkima ‘Ka, keimah’ (myself) tih thlak ve zenna hi a ni. Fakna ri hriat hi a nuama, mi ngaihsan nih pawh hi thil thlakhlelhawm tak a nie, mahse Lal Isuan “ Mi zawng zawngin an fak hunah che u in chung a la pik ang” a ti daih mai. Lar tum hi thil atthlak tak mahni intih mualphona thlen thei a ni. Pathian rama rilru leh rorel leh tihtakzeta thawktu chu lar tum lo mahse thuhruk tak tak theih a ni chuang lo. Pawl pakhata an hotupa ber chu a pensiona, pawl chuan a tlakhniam phah hle maia, kum 20 chhunga a hruainna ah, amah mimal tha mahse a tlin tawklohna lan chianna em em chu a aiawh/ thachang dawltu a chher chhuak lo hi a ni. Lal Isua chuan kum thum chhungin a thachang dawltu tur zuitute a chher hriam hman a ni.

          Tin, hruaitu-a nihna chan leh sem a nih ruala, harsatna lo lang ve thei leh lo awm ve thei te chu- Kan luah tur ni awm taka kan lo ruat ve rilruk dinhmun midangin an luah hian engtin nge kan ngaih thin? Mahni kan han in bih chian deuh hian hruaitu nihna atanga kan tlinlohna leh fellohna kan in hmu ve fo thina, chu kan chaklohna lai mi dangten an rawn hmun ve chiah hian engtin nge kan ngaih thin?

MIPUITE NENA HRUAITU INLAICHINNA

            Hruaitu tha ni tur chuan mipui te nena inremna leh inlaichinna tha tak kan nei tur a ni. Kohhran hruaitu tana hna hahthlak ber pakhat chu inlaichinna boruak tha vawn reng hi a ni ve thei awm e. Thil tum tihlawhtling tura kutke ber Mipuite an nih avangin tih phur, fuih, leh khalh kal reng an ngai a ni. Tin, mipuite inkara inlaichinna tha siam reng a nih loh chuan thawhhona a tha thei lo ang bawkin Pawlin hma a sawn thei lovang. A tawpah hruaitu bawk rel bur tur chu an ni leh thin. Dawhtheihhna leh taihmakna a pawimawh hle a ni.

          Hruaitu emaw member emaw kan nih pawhin pawl leh kohhran chhung inrelbawlna ki ang reng renga, mahni hotute thawhpui tha duh lo reng reng chi hi hotu dinhmuna an din pawhin hruaitu tha an ni ngai lo. Department, pawl leh Kohhran ah te hian dinhmun in anga kan dinpui, kan Rank puite chawimawi leh duhsak hi an har ber thin. Kan chunga mite emaw, kan hnuaia mite emaw hi kan itsik ngai lem lo, kan terh phak deuhte bawk hi itsik an awl thin. Midangte aia chungnun duhnate, dinhmun tha bik luah duhnate hi thawkho kan nihnaa inlaichinna tichhetu a ni fo thin. Chuvang chuan a hotu kan ni emaw mipuite kan ni emaw pawl leh kohhran in a hlawkpui theihna tur a nih chuan rual pata tan kan lak ruala, innghirnghona emaw harsatna emaw kan tawh pawhin zaidawh leh inthuhnuai rawlh taka kan in Hmangaiha kan thawhho a ngai a ni.

         Hruaitu dinhmun hi a ropuia a duhawm a ni. Hruaitu nih tum erawh a sual hran love. Amaherawhchu a dinhmun lai chauh thlakhlelha hi a tha lova, a hruia lai a pawimawh a ni. Hruaitu nih tum dan tha chu hruaitu dik tak zia pu tura inbuatsaih hi a ni. Hruaitu atana tlak mihring hi chuan dinhmun luah lo mahsela a HRUAI tho tho thin. Hruaitu tih tur leh awm dan tur kan sawi tak zawng zawngte kha mi pakhatah a famkima hmuh vek a har hle ang. Amaherawhchu hmasawn duhna leh tumna tak tak hruai kan nih chuan kan ngaihtuah awm lovang. Hruaitun hma a sawn loh chuan mipuiin hma an sawn thei lo.

    “HRUAITU THA NI TUR CHUAN A BULPUI BERAH PATHIANA INNGHAH NGAMNA KAN NEIH HI A NI”

(Hetah Leadership - (Hruaitu nihna) I-na)

Read more »

Mobile Game/App screen resolution thlak leh siam dan

      Mizo te hi kan changkang chakin hma kan sawn nasa ngawt mai, mobile phone kan hmelhriatna pawh hmanni deuh lawk kha a ni mai. Tunah chuan a te ber atanga a lian ber, engmah thawk lo, chawmhlawm atangin Hna sang tak tak chelh ten kan hum ta fer fur mai. ‘Mak’ kan tih thin kha tunah zet chuan ‘thil mak’ ani tawh lo mai nilovin, kan nei deuh vek ti ila kan sawisual tam pui awm love. Aaa! Thuhmahruai teh duah sawi lovin, a thupui-ah lut nghal mai teh ang.

    Mobiles games kan hria, Application leh Utilities kan hre bawk. Chutiang bawkin kan mobile phone hman hi a screen resolution hi a chi hrang hrang ani tih kan hre bawk. Mamawh leh tangkai tak tak kan phone hman nena in mil lo a tam a, kan duh ve si, kan thiam silo, awlsam tea siam leh hman dan han zir dawn teh ang.

     A tam zawk ina kan hman games/app hi Jar file ani tlangpui a, thenkhat Jad file a awm bawk. Kan siam danglam duh, kan games/app kha Desktop ah (a awlsam nan) han dah la. 

Chipchiar tak leh a mawl thei ang berin ka sawi mai ang, hei le:

1. WinRar han hawng la, kan nei vek tur-ah ngai teh ang.

2. META-INF tih folder I hmu ang. A folder kha click la

5. A folder chhungah khan MANIFESR.MF file tih a awm leh ang, kha file kha I desktop ah drag thla rawh,

6. MANIFESR.MF chu open la (emaw Open with), notepad in open rawh

7.  Nokia-MIDlet-Oroginal-Display-Size:www,xxx

    Nokia-MIDlet-Target-Display-Size: yyy,zzz     tih hi copy la, i notepad tawp berah paste rawh,

8. Heta www,xxx -lai hi i target resolution a nia, chiang taka I hriat a ngai. Eg: 240,320

9. Heta yyy,zzz -erawh nangma mobile screen resolution i siam danglam tur ani. Eg: 176,220

10. I duhdan resolution chu thlak la, (overwrite), Save la, Winrar i hawnlai ah khan drag thla leh rawh, Hei hi a pawimawh; I lakna, angai ah chiah chiah khan drag/save leh rawh. Chuan I winrar kha save leh rawh.

11. I mobile ah install la, emaw copy paste la i mobile phone-ah khan, chuan a zo, A khel/hman theih tawh e.

12. Hetia kal duah lo hian awlsam tein a tih theih bawk:

       S60 Jar Resizer Download la, install la, instruction I follow anga, a zo ni mai.

Ka lawm e 

Read more »

Awi Karei:Drama - Scene II na

Pi Baby-I         : Pu Nghak, zahngai zahngai,  inbeng dai teh, (ti chung chuan, Pu Ngaka hmunphiah ken chu a lak sak a, a bula buara chu an tin vang vanga, thapui leh zak kau meuhin a hmunphiah ken lai chuan a bul lawka buara chu…… an vaw ve thawr mai a nih kha!) hetiang hian maw? Hetiang hian maw? I vuak ang a tia.. vawikhat mai duh tawk lo chuan, vawihnih, vawithum,...

(Scene I na  - a chhunzawmna)

[Chutia an rik laih laih lai chuan Pu Siama te kawngka atang chuan hmeichhe naupang pakhat Pu 

Nghaka fanu Mafeli an tih te hi a lo lut hlawl a]

Mafeli            : Ka pa lo haw tawh rawh, ka nu in ati, Kan Kohhran Upa ho an lo leng a, a pawimawh lutuk a ti ania (a rawn ti reuh a)

[An thiltih lai chu an tawp rual duna, an in en ang dun haw haw a; An sira Ngurtei mak ti leh 

hlauthawng lo ding zum zuih pawh chu pindan lamah a tlan phei a ]

Pu Nghaka       : Ka heti reng lovang, lo en reng mah rawh u, In pa pawh chu lo hrilh rawh, min pek vat loh chuan ka dawhtheihna hian a tlin reng lovang, Party mi leh sa hi inti ve dei dui tawh lo se a tha ang. Mai mai..naktuk, naktuk ah ka lo kal leh ang.. (A hnu rei vak loah chuan a fanu nen chuan an chhuak ta a)

[An chhuah hnu reilote ah chuan Pu Siama pawh chu buara kar atang chuan na tih hmel em em in a lo

ner chhuak naw naw a, a na ti lutuk chu a lu leh a kut leh ban chu a rawn nuai nawk nawk a]

Pu Siama     :Kan zawngchhepa chu a van chak lo dawn rua em? A nasa lovang, awiah awiah,..  zawnga, zawng chhe pa, Nghak bala mai mai chu! i chak lovang.. (a in tuai vut vut a)

[Chhungkaw pa ber chutia nupui leh fanau te hmaa Nghak bala’n an vuak tak hrep hrep chu awm reng

nuam a ti vak lo ni ngei tur ani, engdang sawi tam lo chuan a pheikhawk a bun lawk a, a kalna tur 

pawh sawi lemlo chuan a chhuak liam ta nghal a]

                                                                     SCENE II-Na

[Zan dar 9:30 a ni tawh a, Pi Baby-I te in hi veng tlabirh leh veng keltil lam a nia, Veng dang aiin a reh

a, zan a rei hma bik maw tih mai tur hi a nia, an rin aia an pa ber a lo haw har avang chuan, ngurte-i

tak ngial pawh mu lovin a meng hram hram a]

Pi Baby-i          : Ngurte, zanin i thianpa lo leng kha khawilam mi nge?  Engti mi nge anih?.... Kha tukverh thlanglam te kha zuk kalh tha teh, tunlai hi kan veng lamah hian rukru sawi tur an awm zeuh zeuh a nia,.

Ngurte-i           : (A inngaihbel nge, a zak ve deuh chu a sen ap ap a) Hmanni ka pa nen Aizawl kan zin laia, ka thianpa Mama a nih kha, Kan kawmchhak Pu Buaia te tupa a nia, a lo zin a,(thlanglam tukverh pawh chu a kalh kim vek a, a nu hnen a lo let leh chuan) Awi ka nu, ani maw? E ani tak ang, ka thiannu pawhin kar hmasa zan, an inkhawm hlanin rukru an inah lutin an pawisa dahthat a bo thu min hrilh tak a sin.

Pi Baby-i          : (Bang laia an sana pui chek ri tlak tlak chu a en leh zauh thin a) Ngurte, hei i nula ve dawn tawh a, i thian kawm te pawh hi fimkhur a ngai viau ania, (a la hlum tlem la bang chu a  hlum hlum mawlh mawlh a) Keini chhungte hi en teh! heti mai kan ni sia, kan fanu duat lai leh kan neihchhun i nia, i u mama lah, i pa ang mai a ni sia, nang tal-in i nu leh pa zahna tur chuan engmah ti lo hram ang che aw, mambawih. (a la hlum pawh a hlum zo chiah a, a dah tha sawk sawk a) Aw! I pa lah chu tun thleng thleng a lo la haw loh leh aw?

Ngurte-i           : Ka nu, a mak ka ti thin em mai, ka pa awm dan hi, Hmeithai Zuzuar nu hnenah te khan a zuk chattthla leh te a nilo maw? Kei chu ka nu, thian dangte bulah pawh awm nuam ka ti tawh lo, min melh hrek hrek a, a zahthlak ka ti em mai…

Pi Baby-i          : Mambawih, A pawi ka ti khawp mai, Keima thiam loh pawh hi ani pakhat e! (tapchhak lampang chu a en a), I pa nen kan inneih tirh kha chuan, I pa hi pa fel tak ani a, kei pawh theihtawp-in kohhran-ah leh thalai-ah te ka in hmang vea, mahse rual awh luat-ah leh mi-an kan tum luat ah a dik a dawk pawh thlu lovin kan kal a, chutah kan vanneih vang nge kan vanduai pawh ka hre ta lo. Congress an in thlan Lal lai khan, Party Leader ah a in vawrh kai vea, a tha kan ti lo tih erawh kan hre dun reng nachung-in, tih theih dang kan  nei silo ani.

Ngurte-i           : Ka nu chutiang ani thei dawn em ni? (a ngaihna hriatloh hmel tak leh mak ti hmel tak hian a nu chu a en ha a) midang pawh anni ve tho lo em ni?

Pi baby-i         : Mambawih, kan kovah nihna tha leh chanvo tha ka kutah a tlak chiah hian, min siamtu Pathian hi theihnghilh a awl thin a, (a ngawi deuh vang vanga, eng emaw tak veiruk nei niin alang a, a en ngai reng chu a en a, rei lote hnu chuan a chhunzawm leh ta a) chumai bakah khatih lai khan Polictics inchirthehna a hluar bakah dik lo taka sum chelek a awlsam a, sum lama rual ban lo ta na-na leh rual awt reng renga hun hmang thin kan nih takah kan thawhchhuah-in a tlin reng thei silo! Chutah a theih theih eiruk mai loh kha chu tih dan dang a awm lo ani…

Ngurte-i         :Politics an tih fo hi ka hrethiam ve der lo ka nu, a bik-in 'Politics' tih thumal an sawi ri hriat hi chuan Eirukna, inbumna, leh dawt sawi bak hi rilru ah alang ngai lo in ka hria, mahni thawhchhuah nilo sum awmsa hman hi chuan hman thiam a har a, chuvang-ah te ka lo chan ve mai mai a,.. 

Pi Baby-i         :Tun hnu hian ka hre chhuak ta, Party an ruihchilh a, Chi bing politics ah an tlathla a, ram leh hnam tan ti reng chung si hian, mahni chhungkua theuh pawh siamtha thei lo hian Ram hi siamthat belhna leh chuan tur a awm lo tih hi kan hre har em ani. nun hi a hahthlakin hriatthiam a har...

[A sawi zo hman chiah lo tih ah chuan an kawngka chu an rawn kik ri dawt dawt a, Ngurte-i nu leh a

fanu chu mak ti tak in kawngkhar chu an en rual dun a,. ‘Ngurte-i, Ngurte-i nu’ tih a lo rik takah chuan 

rang takin kawngka chu an hawnsak nghal a]

Pi Baby-i          : (Mak ti leh hlauhna nen a thil hmuh chuan a barakhaih ngei mai) Awi ka nu! Eng kan ti ta nge ni? Awi Lalpa,… ka duh lo ka duh lo… (Pu Siama, an pa chu Pu Muana leh Mama te chuan an rawn kuah lut a,  A lu ah leh a ban velah chuan thisen a kai hnuanga, amaha han chechang thei zia-zang ani lo).

[A rang a rang-in Khum lamah chuan a theih ang ang in an muttir a, a chau hle niin a lang, a rawn 

rum chhuak leh tiah tiah thin a; Ngurte-i lah a thil hmuh avang chuang chet-na chang pawh a hre lo 

hial a, a thlauthawng hmel chu a khawngaih thlak let ling zawk hle a. An han buaipui nghal char char 

a, Pi Baby-i chuan anpa chal hliam atanga thisen lo chhuak chu pawnchhe fai leh tui vawt in a dep a,. 

chutah an thil tawn, an chanchin chu an han sawi zung zung a]

Mama              : Khatia ka haw chho kha, kan in ka thleng hman tep tawh tihah, kan kawmchhak deuh hlek ah khan mipahnih hian mipakhat (Ngurte-I pa) an sual rawna, kawngsir-a side drain khuar laiah an tlawh thla lai ka hmu a, a kekawr leh a jacket vel an dap lai pawh kha ka hmu thei a, mi an han hmuh takah chuan an tlan che taa, Thei leh thei lova ka buaipui lai hian, hei ka Pu hian min rawn tanpui ve ta nghal a,…

Pu Hminga    : Nie, khatia ka leng haw lam khan, hei kan nau hian a sawi tak ang hian thil chu a thleng a, mahse ka hmuhna a hlat avang leh, ka thlenthlak meuh chuan, umphak hman anni tawh lo. Pakhat zawk erawh kha chiang takin ka hria. Ngurte-i pa ani tih ka hriat velah hei, Vala nen hian a rang lamin, kan rawn kuah/ paw thla ta a ni (tiin a sawi charh charh a)

Pi baby-i              : Awi ka rei! A van han mak thin teh em aw, Mami pa, mami pa, harh lul teh, harh teh (inhnit feih feih chung chuan a chal kak atang thi lo chuak chu dangin, a theih ang angin a nem phui ta a)

[In inhnaih te te an nih avangin, an thenawm nu, Pi Hma-i pawh lo thleng hmasa ber-ah a tanga, mahse a rin lawk aiia na daih a nih vang leh, a taksa dang atang leh a lu atanga thisen tawp hlei theiloa lo chhuak a hmuh chuan]

Pi Hma-i         :Awi! Lalpa, kei hi thisuk nei ka nia ati zo chiah a, [A sawi zawh hma chuan hmanhmawna    nei miah lo hian an thisuk leh char char phawt a,. Pu Siama a heti nih tawh nak laia…]

(chhunzawm tur)

NB: Nachin lawk khan Juice dawr ah, khaw lum chhuanlam-in  mango shake ka in mai mai teh ang ka tia, ka in zo cheng 10 ka pe a, Cheng 45 min kir a, lawm takin engmah sawi lem chuang lovin, 'India, Vairam leh nghal anih hi', tia mahni inthiam chawp in, lungawi takin ka haw taa,...  

Read more »