Sunday, June 26, 2011

Engvang nge?

A chang hian engvang nge aw? he khawvel anchhedawng-ah hian ka lo pian ve le aw! ka ti thin. Sual sain kan pianga, sual nei reng chung bawkin he khawvel hi kan chhuahsan thin. Nu chhul atanga kan lo pian thlakin, itsikna kan nei nghala, hmangaihna pawh kan hrethiam nghal thin. Chhia leh tha hriat hma hauhin 'chan' kan hlau a, ani, ngaihsak hlawh duhna thinlung kan neih nghal ni.

Engmah nei lovin kan pianga, chu chuan neih ve duhna thinlung min puttir a; ani, chumi neih ngei tum chuan kan hmanhleh thin. A nei loin neih an duha, tam tak nei pawh in neihbelh zel an duh thin. Mihring te hian chin tawk kan hre lo. Duhin chin tawk anei lova, chu chu kan tlakchhiat pui thin. Amaherawhchu sim ahnekin kan thlahlel ber ani lawi si.

Siamtun mihring hi chhia leh tha hriatna hmangin kalkawng pahnih min siam sak a, chu chuan kan nun a kaihruai thin. Chhia leh tha, thinchhia leh zaidawm, nunrawng leh thinnel - engkim hmai hnih nei a siam kan ni. He khawvel, rilru leh thlarau, taksa indona leh in ui leh ar naah hian a chak chak dinchanna a ni tih hriate chu an dingchanga, Ro an rel thin. A ruh no no chhuak ah tih ang chiah in, chak leh remhria, thil tithei te an dingchang a, engmah lo nite chu tu ma hriatpui lovin an zuih ral thin.

Pian hun kan neia, than hun, vanglai hun kan neia, zuihral hun kan neia, thih hun kan nei thin. Hemi hrechianga, theihtawpa tan laa, dikna leh huaisenna hmang thiam chu he khawvel an kalsan hunah pawh, an nihna leh an hming chu zuih ral ve mai lovin par a chhuang zawk thin.

Kan pian chhan kan hriat a, kan nihna, kan theihna, kan finna, keimah, keimahni kan nihna midang te tana kan hmanthiam phawt chuan, miten min chhiar hunah hlawkna eng emaw tal an chharchhuak ngei ang. He khawvel ah hian thiltha tih kan nei tawh reng em? ka thih hunah, tunge tap anga, engtiang chiah in nge min vui ang. He khawvel hi lemchanna ania, a dawhsan ah/ stage ah kan ding meka, lem chang mek kan ni; hmuhnawm kan nih leh nih loh, en tlak kan ni ngei em? tih chu keimahni mimal tin nun theuh atangin a intan a ni. A tawpna erawh midang ten hnukhar in ngaihdan leh thutlukna an siam thin a ni. Nang hmuhnawm i ni em? nge lemchang thiam satliah mai mai i ni zawk?

3 comments:

Anonymous said...

Ekhai! Comment pawh a insitawm rum rum dawn alawm le.. A thain hringnun bulthüm i rawn phawrh lang chiang viauin ka hria.

'..ngaihsak hlawh duhna thinlung kan nei nghal...' i tihte khi ka pawm khawp mai. Chumi tichiangtu ber chu pian tirha kan tap nghal hi a ni awm asin!

Hringnun hi lemchan anga rawn tehkhinin zirtirna thu tha tak i rawn ziak chhuak a, chhiar ninawm si lovin i rawn ziak ril em em mai bawk a, i thiamin i fakawm ka ti khawp mai.

caribou said...

Mihring hian kawng zawh tur pahnih kan nei; "Kawng dik" leh "kawng diklo". Kawngdik zawh tur chuan thil nuam tam tak chan huama insumna tam tak nen kawng bumboh tak zawh a tul chang a awm thin. Kan nihna diktak hi keimahni hian kan hre lova, mahni leh mahni kan intehdan pawh hi a dik ziktluak lo fo thin a. Mite min hmuh dan hi kan nihna diktak a lo ni zawk thin. Lemchanna hmuna lemchang ang kan lo ni reng tak alawm maw le.

I thuziak hi a tha lutuk. A dang pawh han ziak zel teh.

Hmelthatea David said...

@TS & Caribou, in mi fakderna mahnise, ka lawm khawp mai, in comment hlu tak tak leh ngaihdan tha tak tak min hnutchhiah thin hi, phur tharna leh hmasawnna min petu a van han ni tak em!!!, nangmahni avang hian ziah zel chakna ka neih phah a, rahbi thar ka kai ve dawn ta niin ka inhre thin. Kei a thuziah ve te hi, a thiam zawkin in sel loh chuan, mahni nihna lo puiin, kawng min bo tir ang tih erawh ka hlau hlel lo e.

Twitter Delicious Facebook Digg Stumbleupon Favorites More