KA HRE LO

Ka pa leh ka nu hi kum 1975 ah khawlailung ah an inneia, kan unau thum zinga a upa ber a pian hian kan in chu in chhete a chung rangva, a bang dap a ni. a lian lem lo. Ka nu pawh High School zirtirtua a thawh tan tirh a nia, a hlawh pawh a la tam lo hle. Ka pa min hrilh danin an inneih tirh hian fian pahnih, thleng pahnih leh a pawimawh zual, a lova kan awm theih loh chiah an nei tiin min hrilh thin. Kum ruk vel kan nihin Assisi English Medium school, Catholic kohhran siam ah kan unau thumin kan kal a, kg-A atang cl-v thleng kan kal, chutih hun lai chuan keimahni tiat naupang dangte ang bawkin, khawlai len leh tualchai kan hrata, zan kan leng haw, thawmhnaw leh ke pawthura, khuma lawnkai kan han tum zet thin kha chu tap pur chunga tui vawta insil a ngai leh nge nge thin. Mahse khawlai len kan thulh phah chaung lo.

Hetih lai hian kan khuaah zu a tam in, insual leh in vuak hi a tam thei em ema, chutih lai chuan kan khua chu mizoram-a khaw sual ber pahnihna ah an thlang, pakhatna Keitum niin. Naupang ho chuan zurui hi kan hlau em ema, chhan awm lo te hian min vela, a chang leh kan bek leh bekah kut nghatin min khai kang leh vaw vaw thin. a bikin ka hlau zuala, zana kan pawnto zurui kan inbula an lo kal tawh chuan kawmhnuai thim rik rek ah ka tawma, an kalbo hlan nghakin rei taka awm chang a awm thin.

Tlemin kan lo leikang deuha, kawmthlang khawimaw laiah lei tlemin kan lai zawla, beilem kan chhuang thin. chhunah kan huana mi emaw, thiante huana mi emaw antam leh maian kan sik rua, a thenin belte kan thawha, a thenin chawtlang kan thawha, kan chhuma, kan puar ve em em tho zel. Keimahni aia lianin kan ina chini leh bawnghnute phut min lakruk tir thin chu, tlai lama nute hauh tur tih hre reng chungin, aia upate hnial ngam bawk siloin, min laktir thin kha chu hreawm ve thei tak a ni

Luikal kan hrat em em bawk, a chang leh kaikuang leh sangha kahna tur nihliap-a thir leh sairawkherh pawhfan hmangin kan siama, khaw mawng Ngaw luiah kaikuang vehin kan kal thin. achang leh luite kan thliar kanga, kal kan hrat em avangin kiakuang leh sangha pawh a awm mang tawh lo. Chutah tlai lam a lo niha, kan thil man kan han chhep hrang thliah thliaha, ate berin a han thlang hmasa bera, chutah a len dan indawt zelin, kut hum zat lek kan man pawhin ka nu leh pa chuan min lawmpui ve em em thin. A chang leh tui cheng tur ringawt te hian kan kala, malpui leh khup thleng vela thuk tuiah a tlang pang sang atangin kan han in Dive siak mai thin a nih kha.min fuhpawrhtute hmaah na ti em em in kan then khi ve sung tho, dul chu na duh tak a ni, a thip vut vut loh leh a sen vual tut zel.

Kan school chawlh lai te hian ramah te kalin sava kan veh loh leh thang te kan kama, a nuam kan ti ve thei em em thin. ka la hriat reng pakhat chu, ka sava awh hmasak ber tum a ni. thang pasarih vel ka kama, zingah leh tlai tin ka en thin, a awk thei ngai silo. A tawp a tawp ah chuan thang pakhat ah hian Vate pakhat hi a lo awk ve hrama, ka hlimzia chu(h)!, inah ka hawna, ka inti thei ve em ema, chuta kut zungpui tiat vel, han puaha, zungte tiat vel lek ka in tih theihpui chu ka ni hi a nuih a za em ema, min puahsaka, naupang dang ei pawh phal lovin min ei tir ta thoa, nuam ve tak chu a ni.

Zirna lamah nise thiante ho nen hian phawk kan chhuah nasa thei! Zirtirtu te nise an hmel deuh kan han ngaihruata, chutah an mahni ang deuh tur nen kan han hmehbela, Tumbuliana te, Chukchua te, savatea te an ni nawk thin. Tlai lam kan Tution la, haw hma kan duh leh ka thiam tawh kan tia, kan inzawhtira, kan zirirtute hnungah mipakhatin note bu kan hmuh theih turin a lo keu langa, kan By-heart sa chu nal takin kan chhiar chhuak thin.

Vawikhat chu Cl-X kan zir lain Exam dawn hnaihah, tan lak leh zual hun lai takin, kan thianza hovin phawk kan han chhuah leh peka, kan school tlang, fianrial angreng takah Study camp kan neia, Matric exam bei tur pawh kan tam vak lo, 25 vel chiah kan ni. Mipa awmna leh hmeichhe riahna a hranga, inhlat deuh hlekah a ni, kan zirtirtute pawhin ven ngai tawh lovah min ngaia, min veng vak duh tawh lo. Chutah zan dar 12 velah mipa pathum vel hmeichhia riahna room-ah kan bawkvak phei them thema, an tukverh keh kara parda kan han hlim den dena, AR thisen, no bengnei khata kan ken chu an Study room kan han theh luta, a tirah chuan an hlau lo, kan tihthaih zauh zauh avangin, bakah a tirah chuan kuhva eina sen emaw an tia, chutah a rim thang an han hriaa, “min pui ru” “Ramhuai, ramhuai” tiin an rak ta chiam chiam maia, hmeichhe pahnih chu nikhaw hre lovin an ‘kaih’ a, a then an khur zawih zawiha, engmah hre lo ni awm fahranin kan va tlanluta, thisen chu Parda varah te, dawhkanah leh an lehkhabu ah chuan a lo darh nuai a, a then an tapa, a then an khur zawih zawiha, mipa ho lah tumah nui duh der lo, a khawng ho chu zut an ngai hial. Chutah kan zinga ‘Christ’ deuh ber, tihthaih rawt lai pawha, phusa ber pakhata tang chu, tih tak zetin kan han tawngtai tira, a hnuaa a sawi leh dan chuan intih puithu a har hle ni tur a ni! a tuk zan atanga kar khat vel thleng chu YMA, JAC ten silai leh torch light in kan school chu an venga, nuam lo ti deuh chungin kan khi vur vur. Thenkhat lahin, ‘a hma tang reng tawh khan ramhuai thawm an hriat zeuh zeuh na hmun a ni reng a ni’ ti tawk lah bo lo. Huiha! Khawvel hi a buaithlak nih hi!