Monday, June 6, 2011

Kei ve hi


Tunlai khawvel thangchak tak ah hian hmasawnna leh thiamna ten min kal pela, ropuina leh nihna ten hriat loh kar in, min lehpel ta zung zung a nih hi. Thiamna leh ropuina pawchhuak turin a thanmawhbawk lekin kan hriaa, thiam ta lua emaw kan in tih laiin, mi nuihzat mai kan lo ni si thin. Chawimawina leh fakna ten kan beng a thlen zo ve lova, chutih a hnekin engtiang chiahin nge mi fa ten hma an sawn tih pawh kan hmuhpui thiam na hek lo. Mi fate theology ropui tak tak an ziah pawh, han zir eng ang mah ila, kan thluak in a pha thlawt lo; mifate thil siamsa pawh kumpui lingletin han zir mah ila, kan var pawh chuang lo, a buaithlak a nih hi,… engvang nge he khawvel ah hian ka lo pian ve ngawt le aw? Engnge ka hmabak, hmachhawp ka nei em?, engtia siam nge ka nih? Tih pawh ngaihtuah pha lo tan hian khua a var hlawl lo. Mifate neih ang kan hmua, an hausak zia te, an thiamzia te, an ropui zia te kan mitin kan hmu ve thei reng tho sia, engvang nge kei hi? tih hi awlzate a ni. A channa chu hrilhfiah chawp ngai lovin kan bul lawk, hmuh reng theih ah a awma, tam tak chuan hmu reng chungin kan hmuhthelh fo thin. Hmangaihna tem ve turin inngaihzawnna chauh tem tir ka nia, lunglen hre ve tur tingtangin hmangaih te bumin ka awma, ngaihsakna hre turin kei hian hmangaihna pek chhuahna tur ka nei thlawt silo. Hringnun hi lemchanna khawvel a ni tih hre turin ‘eng hi nge hringnun hi’ tia zirtir chawp tir ngai ka la ni zel vei bawk si nen.

           Mahse hei erawh ka hria, Mi hausa tak tak, duh duh engkim lei thei te hi an hlim ber loa, khum nuam taka mu te hi an mutui kher lo. In leh lo tha pui pui chhungah hian hlimna leh lawmna a awm bik kher loa, chutih a hnekin kan hriat miah lovin hmangaihna leh ngaihsakna an thlahlel ve ngawih ngawih asin. Retheihna hi pianpui sual a nilo tih ka hre bawka, chhandam ni tur hian Pulpit tlang chan kher angai lo tih ka hre bawk. Kei mirethei, in leh lo tha nei lo, car man to tak tak nei lo leh chan tawka lungawi hian chhungte tih tur ka neia, kan inchhungkhurah hmangaihna leh induhsakna, hlimna leh lawmna, in hriatthiamna leh Pathian-a lungawina  a awma, hei lo liama  malsawmna hi a awm chuang bik em ni? Min han chhang teh!
             Vawikhat chu naupang pakhat hi tuiah a tla a, a mangang em em a, tanpuitu tur a auh lah in tumah chhantu a nei silo. A tawp ah chuan Putar pakhat hian mau tlawn in a rawn chhanchhuak taa, chu naupang chu a lawm em em a, putar hnenah chuan a nunna a chhanchhuah sak avangin lawmthu a hrilh mawlh mawlh a. Nimahse putar chuan engtin nge a tih, “I nunna hi chanchhuah tlak nunna a ni ngei reng em?” tichungin a kalsan taa.....

8 comments:

H.Vangchhia said...

Mihring nunphung, kan ngaihtuahna leh zia hrim2 hi zir angaiin hriatthiam hi ahar ka ti fo thin.

Anonymous said...

Eu! Luangliam hle mai!

Krista Roluahpuia said...

I ngaihtuah tha khawp mai. I tih tawp dan pawh hi a mawi khawp mai. Isuaah hian hlimna famkim a awm a ni.

A kutchaktaka in innghah tlat chuan a ti mualpho ngai lo ang che.

Hmelthatea David said...

@TS, nie ka luangliam zawih zawih e, kan thu leh hla te hian hei bak a pel ve thei silo, i lo lenglut a, i ti lawmawm
@Krista, i lo lenga ka lo lawm lut a che, keia thu fahrah te te min rawn komen saka, i lo lenglut fo dawn nia

caribou said...

I thuziak a tha thei ta hle mai. I blog rawn luh pawh a nuam riau.

Hmelthatea David said...

@Caribau, keia thuziak ve te chhiar tlaka i ngaih avangin, a tak tak nilo mahse ka lawm e, i lo lenglut ve thin dawn nia, ka theihtawk in ka lo update ve thin dawn nia,..

zoho said...

Ka lo leng e hei. I trek trek hi ka duh thei riau. Mahse ka hawng thei lo. hehe.

Hmelthatea David said...

@ Zoho, i ti lawmawm, a mak ve, Blog Archive atang hian a luh theih ang,. A blog title hnuai atang pawh hian a luh theih e,..

Twitter Delicious Facebook Digg Stumbleupon Favorites More