Tam kan tih hi a tlem e!

Mizo ten tam kan tih hi a lo tam lo khawp mai, hei hi a chhan ber nia lang chu number chhiarna-a Tluklehdingawn thleng chauh kan neih vang a ni ngei ang. Diarphawng en, Vatelubeuh tih ang reng number chhiarna kan neih lah Official-in kan pawm lem lova, nuihza fiamthu nan mai mai kan hmang sia. Hengte pawh hi pawm vekin tlukdingawn aia tam fe number chhiarna hi chu nei ila, khawvel huapin tam kan tih pawh hi a tam ve deuh tur.

Rambuai dawn tep khan Putar pakhat chuan kan hnam sipaite ralthuam ngaihzia hahip-in an sawi a, ‘E! Grenade ringawt pawh iptepui leng hawk an nei alawm. India sipaite chuan engtin nge an hneh teh lul ang?’ a ti. Nia, iptepui ang hawk grenade tam ti tan chuan thil hi a lo tam hma dawn em a ni.

Lunglei chhim lama khaw pakhatah pawh, Pa pakhat chuan Sapthei a ngah viau ani awm e, an sawi ka hre reng thin. A sapthei chu hralhna zawn sak turin mithiam a rawn a; Tin 5 zet a zau-ah chuan sapthei a thar tam deuh ani ngei ang, tin tamfe a thar ni ngei tur ani. Phai lam Company-ah an zu zawh saka, anni chuan ‘duh e, matric ton engzat vel nge in rawn thawn theih ang?’ an rawn ti ta mai ani awm e. Kan sapthei ngah inti chuan metric ton khat (1) pawh a lo nei mang silo ni ngei tur a ni. Tam kan tih hi a lo tam thin lo a ni.

Tlabung border trade chungchang Delhi tlanga Sawrkar mi tirhten an rawn endik a ni awma, ‘he laiah hian Border trade hi han ti tak tak ila, pawisa virvel engzat nge ni awm?’ an tih chu an mi rawnte chuan ‘cheng nuai sawmhnih’ vel chu a tling ang’ an tih thawm ka lo hre ve a, titi maia ka hriat phei chu ani a. Chutah Delhi mi pawimawhte chuan buaipui tlakah an ngai ta lo ni awm takin an sawi ka hre thin. Nie, nuai 20 vel ringawt chu Border Trade-a sum vir velah chuan a tam lo a ni. Mahse keini chuan nuai 20 chu sawi loh, nuai khat pawh tam kan la ti hle chu ani sia.

Aizawl motor tamzia hi kan sawi fo a, mahse Calcutta leh Delhi leh hmun dang dangah han kal ta ila, Mizoram-ah motor a tam loh zia kan hre ve thei ang. Kan kawng chep leh chhiat lutuk vang mai mai hian motor a jam a, a han dingtlar put mai hi tam kan lo ti leh mai thin a, mahse hei hi tam ani lo, aaaa! mizo-ten tam kan tih hi a lo tam lo a nie. Tupawi mah ka sawi em lovang chu.

Source: Ramhluna Hnamte; Vanglaini