Chanchinbu tam taka thuziaktute leh Pulpit tlang meuh a thusawi te leh, Cable TV a ‘Ka vei zawng’ tih programme a thu thawh tu tam tak te hian ‘Mizoram, kristian za a za inti ramah hian’ tih hi kan hmang teh fo thin a , hei hi ni kan in tih vang nge kan in hriatchian tawk loh vang tih ka hre chiah lo naa, mimal tin hi in zawt chhuak te vek ila chuan “Mizoram, kristian za ah za kan ni” ti kan awm chu ka ring hauh lo mai.
Chhiarpui hnuhnung ber leh kan rintheih tharlam ber 2001 Census atang khan kan dinhmun diktak hi enchhin ila, tehfung tur dang a awm chuan bawk loh avangin a rintlak turah ngai theuh bawk ila atha awm e.
Kum 2001 chhiarpuiah khan mizoramah hian mihring 888,573 kan awma, chutah chuan mipa 495,109 leh hmeichhia 429,464 kan awma, kristian zawng zawng kan vaiin 772,809 kan nia, Missionary tirh chhuah tum aia tam daih kristian nilo mizoramah hian 115,764 zet an awm a nih chu!! A percentage zawnga kan lak chuan mizoramah hian kristian 87.00% kan awm tihna a nih chu (Data on religion, 2001 census mizoram, issued by Directorate of census operation).
Chuvangin tun atang chuan ‘mizoram kristian za a za inti ramah ‘ ti fo tawh loin, ‘ Mizoram kristian za ah 87 ramah hian ti zawk tawh ila a tha awme.
Nih leh a dang chu tute nge ni ta ang? Mizoramah hian Hindu 31,562, muslim 10,099, sikh 326, buddhist 70,494, jain 179 leh a dang neuh neuh sakhaw nei lem lo 3104 an awm bawk ani.
India ram state thenkhata kristiante dinhmun hi kan hriat ve reng reng a tan pawh a tha awme. kan thenawm state Nagaland ah kristian 90% an awma, anni hi india ram state a kristian tamna ber state an ni. Meghalaya ah 70.3%, Manipur ah 34%, Goa ah 26%, Andaman & Nicobar island ah 21.7%, kerela ah 19%, Arunachal pradesh ah 18.7 te an awm ani. hei pawh hi tunah chuan engti zawng emaw talin a danglam leh fe tawh ang tih chu kan ring thiam mai awm e.
Lal Isua zirtir Thoma rawn luhna hmun Tamil Nadu ah khuan kristian 6.1% an awm bawka, mahse a mihring zawnga chhut chuan Mizoram mihring aia tam fe maktaduai 3 chuang zet an awm tho. Nagaland-a kriatian zawng zawng pawh khi Mizoram mihring zat aiin zuk la tam fea. India ram a kristian tlemna ber state chu Lakshadweep niin kristian 509 ahauh an awm mawle.
Mizomah pawh kohhran tam tam kan awm a, Statistical handbook of Mizoram 2004 ( P.no 138) ken en chuan kohhran thenkhat hetiang hian kan hmu thei bawk ang. Presbyterian 445,303; Baptist 113,837; Salvation Army 45038; Seventh Day Adventist 16,982; UPC (Mz) 33,171; UPC (NE)77,770; Roman Catholic 24,081. heipawh hi tunah chuan engti zawng emaw tak chuan a danglam leh fe tawh ngei ang. Population atanga Kristian nilo zawng Nuai khat chuang hi Mizo nilo turah lo dah ta ila, an thahnem fu lo maw? He Mizoram zimte, la thawl ru angreng tak siah hian Hnam dangten min chimral mai loh nan tan kan lak a tul hle a ni.
Fa neih tam zawng ringawta Family Planning kalpui loin, engzat pawh nei ila, chumi chawm thei leh chhungkaw inrelbawlna pawhin a tawrh loh dan tur kawng zawng zawka Family Planning pawh kan kalpui a tul lo maw? Mizoram, kan ram neih chhunah hian kan thenawm State te atangin Vai kan tih ho hian nitin min rawn fin ruih ruih renga, Chakma ho mai bakah Pialral kawng lam a tangin an rawn chhuk deuh reng bawk nen.
Hengho min chimral mektu(?) te hian tute in hnuai tak luah hlawm ang maw? Engtik ah emaw chuan Kristian te hi kristian lo ai hian kan tlem zawk ang tih pawh a sawi theih miah loh a ni. Chuvangin tun ang zela kan kal chuan Kumar Singh-a te hi kan YMA hruaitu an la ni palh hlauh ange. Chuvangin nang enge i ngaihve dan?
