Saturday, August 20, 2011

Ka haw dawn!


Kan ti ve bek bek a, kum 6, 7 a lo ni ve ta reng mai, Zirna sang zawk kan paw chhuak ve dah lawm maw tiin Mizoram chhuah san in Hmun danga kan han awm ve a. Mifate ang erawh pha lo mah ila, mahse a ningkhawng chu kan hmu pha ve hram hram a, Hlawhtlinna kawng zawh harsat zia leh Mi fate hian eng ang chiah hian nge Hna an thawh a, an zir han hmuh hi chuan, mahni-ah duhkhawp lohna a nasa thei khawp mai. An ke chheh kan hmuhpui a, kan ram neih chhuna kan thalai te nen han khaikhin phei chuan Thiamna lamah rual-awh a na duh khawp mai.

Mizo Thalai te hian engtik ah nge ‘Hna thawh’ awmzia hi kan hriatthiam ve ang le aw; tiin duhthu ka sam ve thin a, Eiru tun tun chunga dawhkan a hnathawh aiin dik tak leh fel taka bankhur laih hi a zahawm zawk zia engtik ah nge kan hriatthiam ve ang. Hna thawh peih loh vanga, hna a vâng kan han ti thla zen te leh hna neilo, a pawl zawnga kan han ding te hi hnam dang te hian min hria ang tih a hlauhawm takzet a ni. Kan khaw hawi zim luat ah sawrkar hna chauh hi em ni ‘hna’ kan tih dawn, Post pakhat za chuang in kan in chuh luih luih a, kan thiam anih chuan khawi hmunah pawh hna thawhsen loh a awm tih hi i ring in i bawhzui ngam ang u, Kan ram zim te chauh beisei lo hian, I chhuahsan ngam ang u! Nge lehkhathiam (a hming chauh) a BA, MA val inti hi Vairengte pel a, buai tur kan tam lutuk zawk. Survival of the fittest tih ringawt kan kalsan a hun tawh, Competitive han san tawh zia te hi aw!! Thiamna leh hmasawnna hi a zuan in a zung tak meuh a ni, Entirnan, College/ institute tha chin a Economics la tur ringawt pawhin 95% hmuh pawh hian beisei tih san ringawt pawh a theih tawh loh. Chutiang bawkin Competitor tha tha an tam lutuk Hna chungchang ah ringawt pawh. A hminga Degree neih ringawt pawh hi a tawk lo, eng emaw ber ah thiam bik (professional) neih loh chuan engmah kan ni chuang lo..Kan khawvel hi mahni khua ah leh Mizoram ah ringawt atawp a nih chuan, dinchhuahna leh hmasawnna chu kan hlat tial tial tihna a ni, beisei ngam chi pawh a ni lo. kan harhchhuah a hun tawh takzet e.

A thupui atang ka va peng thui ta em! A thuhmahrui ah a tawp mai dawn, kuang lo nawr ah min lo ngai lo la, A thupui ah- Mizoram, ka ram, ka pianna, ka seilenna ah ka haw tur hi ka va lawm em! Kumpui linglet takmeuh a, hah thi kul a, ka ram neihchhun tana hreawm ka lo tawrhna te hian, beiseina nung a par chhuah tir dawn ta em ni! Kha chen ka lo chhuahsan tawh che a aw, nang Mizoram, tunah i fa hi min lo lawm dawn lovem ni?

(Ka blog hi hna tul vang leh eng eng emaw a awm vang hian, tun hnu hian ka update tha thei lova, chu mai piah lam ah ka hul ema a, ziah tur ka haihchham em a ni; A dera min hlutpui tute chungah min hriatthiam hram ka ngen e.. Post thar tha tak tak in nei a, han comment tur chuan, kei ngei pawh ka blog ah hian ka lut thei ta meuh lo a, ka comment thei ta lo che u a, pawi ka ti takzet a ni e. Thenkhat tan chuan a ho viau mai thei, mahse! Khawi hmunah pawh awm ila, Mizoram tluk a nuam a awm chuang em ni?. Kar leh mai a haw tur ka nia, engtia rei nge ka awm dawn ka hre lo, ka blog pawh hi ka update tha thei lo mai thei a ni… In ngaihawm dawn mange aw..)

Thursday, August 11, 2011

Sipai Boot : II na



Thuamtea Khawlhring

Nula try nan hian thil te lua a awm thei lo. Kutzungtang han tihchet dan te leh kuhva thial dan chenin a pawimawh vek. Chumi zana U Chheuva petromax khai pawh chuan a zan dang zawng aiin a uluk a, Biak in liang chung lama a han pawt chho te chu a zei kher mai. A khai kan hma hian vawi 20 chiah a pump leh phawt tih hi sawi angai lo. In then miah lovin a khai kang a, ban pahnih inkara a khaina hrui inthlunna herh vir theih a han herh vir vel te chu a bu ang thlap a ni. Rozuali thutna hnu, ni e, tawngkam danga sawi chuan, a mawng thianghlim a nghahna hnu chu a han thlir vung vung a, a hrawk bawk a pial rulh a. Zaninah te hian khawngah tak thu leh ang maw?

Inkhawm dar a vuak tan chiah chuan Biak In chowkidar Aibila chu a dan pangaiin a lo lut hnuang hnuang a, a thaw hlui hlui a. Dar ri vu vu karah chuan U Chheuve chu a rawn pan a, “I ti lawmawm thin hle mai, tang te te !” tiin mei nei takin a then thu a. Bila te lai laiin chutia an han ti ve ta chu U Chheuva thin a thawk teuh kher mai. A han tihdanah chuan mikhual nula an awm apianga petromax chhi thinah leh dar vaw thinah a puh niin a ngaih theih a, huatthlala tak a ni! Tih emah chuan, mikhual an awm laia a dar vuak hnuhnun ber tum kha kum tir lam, sikul tan hma daih tawh kha a ni a, tunah chuan vaimim te pawh a thar tawh asin! Mikhual nula awm apianga dar vuak chuh a ni awzawng lo! Khang lai phei kha chuan sipai boot pawh a la nei hlei nem.

Inkhawm chu an tan ta. Rozuali pawh a changtunu niawm rengin a hnuhnung pawhah a rawn lut a, a ngaia riang vala hi a va dawn lo em! Puan dang a rawn bih, kawkpui zikziak nge lenbuang thuam tih U Chheuve chuan a hre hrang chiah lo. A han pen dan te reng reng chu, hmeichhia pen dan niawm tak hi a ni bik a, a kal zawnga a mawngbawr han insiksawi vel te chu thlawhbawk tournament-a inchuh tham a ni! A han thu ve ta a, an thutna tlar, thutthleng upa tawh tak pawh chu a duhawm thar ngawih ngawih a. Chhei, a kun ta! A biang mam paw thar mai chu a beksam kir lek lek chuan a khuh a, chum dum kara thla chhuak ang mai hian a khuh bak chu a var paw pheu mai a. Ni, a tawngtai a ni! Zanin zet zawng a tan hun danglam ani dawn, theihnghilh tum mahse a hre reng thin ang.

An Upa chhuanvawr Upa Kawla thu sawi chu kan U chheuva’n a hre mumal lo chu dem theih a ni lo. Rualpuite fa lehchhawng te pawh tu leh fa nen an inkai kawi duah duah tawh a, mamawhna hi a sang lutuk tawh, a sovin a so bulh bulh a ni ber mai! Sibudar Thangliana’n a hetih hun khera sipai boot a rochuntir hian awmzia a nei ngei dawn. Tih emah chuan Rozuali te chu khaw khat nula hmeltha leh khual kai chin kha an ni ve a, silipar sen hrui chat tawh nena khawih lunglen mai mai mi an ni bik lo. Sipai boot thar tha veng vawng erawh chuan kori a tu ngei dawn tih a lang reng tawh a, Pu Dopherha parandi coat hawh tur awm lo mahse a pawi thui lovang.

Petromax lah chu U Chheva rilru hre miah lovin a eng nual nual mai a. Han chhe der vel se, han alh eng deuh phut phut se, Rozuali te hma awl zau laiah ngei chuan U Chheuva’n han siam tha vel se; a phung sahmim nen lam chuan han thlak kual vel se, han pump leh zeih zeih mai sela! Tlangval naran lo tak a ni tih hi Rozuali chuan a hriat ngei ngei a ngai tlat. Le, Rozuali te khua chuan hla an rem dawn ta. Mipui hmaah Pulpit bulah an ding chhuak a, zaipawl hruaitu chuan a ‘doh vang vang mai. Rozuali pawh tlar hma laitaah chuan a ding tai tek mai a, U Chheuva thin chu a phut dut dut a. An han zai tan dawn a, “Jordan lui…….” an ti hman chiah a, chung lam petromax chu a alh ta phut mai le!

Golden chance!!

U Chheuva inperhtho lai chu tumahin an hre lova, amah ngei pawhin a hre lo! Petromax inkhaina hrui herh vir hniam tur chuan tlar hnunglama a inherh virna invuahna va pan a ngai a, a va herh hniam hmasak chuan Rozuali te hmaa petromax la thlatu dinhmun ropui tak chu a chang pha lovang. Chuvangin, petromax khaina zawn, Rozuali te hmaah chuan thli thaw aia chakin a tek phei a, chowkidar Bila chu petromax khaina herh hniam turin a han vai a. Zaizira Bila a han be vel pawh a zei ngang mai. Rozuali te conductor Thianga solfa vai aiin a ennawm zawk hial awm e!

Petromax a rawn chhuk thla nual nual a, dingdihlip tak meuh hian U Chheuva chuan a lo ban a. A han la thla a, Rozuali ke bulah ngei chuan a han nghat a, a chesual tawh dawn lo reng rengs! Mahse, beisei loh lam atangin thil pawi a thleng ta tlat mai. Chu Biak In boruak reh thuap mai hnuaiah chuan Bila chuan petromax chu a rawn chuhpui ta tlat. Mi huihphai lam a lo ni vei nen, mikhual nula hmeltha hmaa han intihvai tingtang vel a chak pheng chuan, “Thawi, theima pump! Lo thawih ve thuh” a rawn ti ta tlat mai. Upa Lalbiaka chu a thuthmunah chuan pawiti takin a lo chek hlak a, mikhual hmaah an khawtlang an mualpho ngei dawn mai. Thuhriltu Upa Kawla pawh pulit tlang atang chuan a rawn dak duk duk a. Kohhran Secretary chu a han mitmei zoh a. Mikhualho lah chu laklawh fahran hian an ding thap mai a, an hmaah chuan U Chheuva leh Bila chu an nak a innek ngat ngat mai bawk a.

Rozuali ke thiah no chek mai ngheng renga petromax han pump zeih zeih a lo chak vei nen, mipui hmaah chuan BIla chu han hnial chi ani mang silova, a thutnaa a kir leh dawn lahin a la hun si lo, a lai kual vel vek mai a. A tlawmngai chuan, “Lo khawih lo mai rawh, nang aiin ka thiam zawk” tiin Bila beng bulah chuan a han ti sur sur a, ani lah chuan a nghawk doh suh chauh mai a. Bila lah chu ami zawng laiah a tuan muang chi, thil engmah han thiam nal thlip thlep lo chi a lo ni a; petromax pawh chu han tih nun that leh mai tur a nih laiin a ti thi ta tak tak a, a thim thup ta mai a. A tawng an hre pha vek tih hre miah lovin U Chheuva chuan Bila beng bulah chuan, “kha, ka tih reng kha! Lo khawih tawh suh” a han ti bul bul a. A beng hi a that chiah loh avangin zawiteiin a sawi theih si loh a, Rozuali te chu an lo nei tet tet a. Chutia a’n thim takah chuah rang fahranin U Chheva chuan safety match Horse Head ngei mai chu a’n phawrh a, vawi thum a tlawlh hnuah a chhi kai thei ta hram a. Rozuali ke bulah chuan a pump ta zeih zeih mai a ni.

Khai kan a hun, a eng tha ta. Hun a khaihlak rei tawh avangin a khai chhohna hrui herh tur chuan hmanhmawh takin U Chheuva chu a boot ropui nen chuan a han pen chhuak a, mahse tum thuhmun Bila nen chuan de chhuai khawp hian an han intauh leh ta pek a! Tukkhhum chul vat vat pah chuan U Chheuva chuan Rozuali chu a va melh a, a rumol humna kuta a hmui hup pahin hnuailam melh hian a lo kun a, a nui ngei a ni! A khai chhoh hna Bila a kian ta chu a tifuh ngei mai, avang chu Bila hmanhmawh lutuk chuan a khai then a, zaipawl chungah chuan a inthen nulh nulh mai a, mi chu an nui huk huk a. Mi nuih a zat laklawh tlat tawh avangin zaipawl rawngbawlna pawh a tla na dawn lova, petromax inthen chu man din ngei a ngai. Chhuat atang chuan ban phak rual ni hek lo, Bila chuan zaipawl zai lai hmaah chuan khuangpui hunna chu a khuang chawpin a hnuk phei a, a lawn ta ur ur mai a. Pa tawi thau nelh nulh a nih avangin a ban pha mai si lova, boruakah chuan a invai vuat vuat a. In sum theih zawhzai ni tawh hek lo, mipui chu an nui hluah hluah a, Rozuali te zaipawl zai lai pawh chu zai tha thei aram an awm lo. Petromax a han man chiah chuan a dinna khuangpui chu a dahna atangin a tla ta si a. Saprano satute chu a bawh eng ta dual mai a, a khawlo zo ta! Chekah chekah!!

Tihdan phung pangaiin inkhawm banah chuan Upa Sawibuta inah an han zaikhawm leh te te a, U Chheva last chance a ni ta, Now or never zah fakah lu em a chhum lovang tiin Rozuali khuap khur chuan a hnungah chiah a thu a, a sam chhawllengin a rawn zah thawh thuak chang te chuan a lungphu a chawl lo chauh zel a, a intipachang hram hram a. Zai karlaka thingpui in lai chuan, “Rozual, naktukah em ni in hawn dawn” a han ti ve thuai ta mai a! Chu thu sawi chhuak tura a in-ap nasat zia chu thangthar chuan an hrethiam pha lovang. Rozuali chu a sam chhawlleng han thing pah chuan mawi takin a rawn lehhawi a, “Awi, U Chheuva a ni reng mai! I lo zaikhawm ve ani maw?” nui har har chungin a han ti a. Kan u thin chu a phu dut dut a, “Engtin nge ka hming te i lo hriat ve a?” a han ti tham chhul a, Rozuali chuan, “Nang ang milar te chu kan hre zel alawm. Banah min thlah haw rawh aw, ka thlen in te’n chhangban an chum a nia” a han ti a, an zai tan leh ta a.

Chhei kha raw, kan tih reng kha! A nghing a awm tlat! Biak in chhunga sipai boot hnum tle hlarh mai a hmuh atang khan he nula hi a pangai tawh lo tlat! Chawhnu lam khan lungdawha han pawh penna hun phei chu awm se, tunah hian kohhranin an phuar tawh ngei ang! Chatuan tluka rei an zai leh hnu chuan Kohhran chairman a tawngtai a, an bang ta. Khawkhat nula hmeltha zui haw tur, a phalna ngeia zui haw tur a ni bawk a, U Chheuva chu vanrang chum karah a leng tak meuh a. Rilru fim pawh a pu thei lo chuan kawng lai thimtham zinga bawng bawk chu a boot lawk pui mai chuan a’n chhuih thawr a, an bawngpui rai lai lah lo ni rengin! A note a pet hlum em lovang chu maw!

Rozuali thlen in pawh an hnaih ta, chhangban chhum rim a nam chak chak mai. Tlaipui khaw zotlang sanga zothlifim lengvel karah Rozuali powder rim leh chhangban chhum rim han inpawlh kual vel hip luh chu dam sawng sawngna tham a ni. Thlen in te pawh an lo la meng a, tlangval tlawmngai U Chheuva chuan pathlang lam, tui hunna lamah chuan inthlahrung tak chung leh nuam ti ru tak chung siin a pan vei dun dun a. Thlenin nu chuan, “Awi, U Chheuva lah ni rengin! i va han fel em em ve? Mei engah hian lo thu rawh, kha lamah kha chuan kal suh, chhuat kha a mawih a nia” a lo ti sawk sawk a. A sawi zo chiaha tui um hunna bul maurap chhuat mawih tawh chu U Chheuve sipai boot lawk pui mai chuan a rap tliak tak tak a, a tla hawlh ta rup mai a.

Tuium an rawn tlu a, in man din a tum chuan an bungbel dahna chhuar derdep tak chu a vai thlu pah bawk a, a ri ta rum rum mai a. Bungbel leh tuium darh nuai mai karah chuan kan U Chheuva chu rem lo tak mai hian zau fahranin a kar phun a, a ke dinglam chu a tang tlat mai a. A tanhmun han siam rem mai tur chuan a ke chu a tiche thei si lova, um elh zet mai chuan chhuat laiah chuan a her tui mai a. A kar nasat em avang chuan a kekawr kap a’n tet zui a, kekawrte chu ha ve bawk mahse, a khel lama kaihna pawhfan chu a lo rule tawh a, a thil thuhruk chu a rawn uai ta thuah thuah mai a. Mei eng chhawng zawng takin a kar suah mai si a, lang lo tura thuhruk reng a awm lo! Rozuali leh thlen in nu chu an mangang em em mai a, pa ber leng an ko chul mai a. Chhuat mau za tliak leh thawmmawl ban thel mam loh inkawkalh vel karah chuan a sipai boot lianpui mai chu a tang tlat mai a, a va han ti mualpho nasa tehreng em!

Thlen in pa leh Rozuali te khaw tlangval puihnain an inhnuk chhuak thei ta hram a, an chhangban erawh zawng lem a har deuh a ni.

Chu boot zet chu!!

Friday, August 5, 2011

Sipai Boot

Thuamtea Khawlhring

Phung tuibur hi engnge ni ang tih ka ngaihtuah thin a, tun thleng hian ka la hre chiah lo. Chutiang bawkin sipai boot hi eng ber nge niang tih ka ngaihtuah fova, khawvel-in eng ber hi nge sipai boot nia a pawm tih te, Chamber's Dictionary-in engtinnge a hrilhfiah tih te, Hav. Pakunga Lushai-in engtin nge a sawi ve tih pawh ka hre chiah lo. Keimah hian pawmdan erawh ka nei ve a, ka pawm dan hi mi pawm dan anih loh pawhin ka vui chuang lova, ka buai chuang hek lo. Ka pawm ve dan chuan sipai boot hi chi thum a awma- (1.) A pakhatna chu puan chhah deuh tak, a rawng pawh a hring ani. A hnuai chu thelret chhah pui ani a, a rawng pawh a sang a, ngalrek thleng lai ani. Hrui sei tak anei a, thil fe a ngai. A tak hi savun ni loin puan a nih tlat avangin a zawi deuh a, ka dah sang vak lo (2.) A pahnihna chu, sipai boot han tih lemah puanpheikhawk sen ang chi kha a ni a, sipai boot-ah rau rau pawh a nep ber chi ani. Sipaiin an dawn ve thin avangin 'boot' kan han ti ve mai a, a awmnem hle. (3) A pathumna hi a ropui ber chu a ni. Savun dum a siam, khauh khawng tha tak mai ani a, a hnuai pawh thir kual khauh tak ain vuah ruih mai a, a rit hle. A rawng sang ani a, chawn thleng laia asang pawh ani thei. A hrui lah chu a han sei mai mai khawp a, ka pu bengchheta hnang hlai chen zet a ni. A thilna tur kua lah chu a tlep hian a tlep tuar mai a, sechal ek han chhuih thawih nan pawh duhthusam a ni. 

Chutiang taka pheikhawk ropui chu keini ang Tlaipui za nufa khaw naupang tan chuan mumang lamah tih mai loh chuan a hmuha han hmuh mi rual ani lova, a neiha neih phei chu suangtuah chi pawh a ni lo. Sipai, darfeng val ngei maiin thuam famkim nena an han bun khup mai hi chu a ropui dan chu namen lo tak ani a, a thawm a ring si, khawvel hi an ngam hliah hliah mai a ni. Pu Chhingtawia huan mawng hel hling hmun kan kal ngam lohna te chu sipa boot dum nena chil pherh chakin kan suangtuah fova, kan sava vehna leh kan daivahna ilo vela thingsemim hling fahran pawh a ninawm zozai lutuk deuh em a, sipai boot nena han rawt siah siah kan chak ngawih ngawih thin. 

Minaran neih phak loh sipai boot rawng sang, a suihna inphan tuak mai leh a thilna kaw tlep tuarh mai, sipai chhuti Pu Thangliana'n kan khuaa a rawn bun haw chiah kha chu damchhunga theihnghilh chi ani tawh lo. A kalna apiang ah naupang chuan kan zui duh dul mai a, Artan veng chirhdiak a han rap pherh vel leh kawng kama a hniak lang kulh kulh mai te chu kan thlir ning thei lova, Pu Hrangchuha se ek khawro a han vei chhuih phei kha chu aw, a leng thui vawn vawn teh e! Nula Lalkaii te sumhmuna mau ram a han rap tliak beih mai a, kan football neihchhun Kapsanga vawk phing chu a vawi khat chhuihah a pet keh bawk a, chu pheikhawk ropui zet chuan kan nunphung a thlak danglam hneh hle!

Kha pheikhawk namenlo tak mai kha Tlaipui khaw tlangval senoir U Chheuva'n engtinnge a lo neih ve teh khiah tih kha ka hre reng tawh lo. Engpawh ni se, chu a sipai boot turu tak mai chu Sibudar Thangliana'n a kal bopui leh ta lo kha kan khaw tan chuan malsawmna ropui tak zawng a ni.

Sunday tukah Hotunu Rinpuii te pheikhawk nawhna hawh chawpin uluk tawkin a han khuih fai a, dawrkai Vawma siai dum a bat ngei mai chu ngun fahranin a a han hnawih a. Thlan tla phunga a han nawm meuh chuan namenin a tle tawh lova, a khaw pumin darthlalang atan kan hmang lo chauh a ni! Miin raldo nana an pheikhawk vohbik ngei mai bun chuan Biak in kawng a rawn chhim zawh ngut ngut mai a, khaw thenawm kohhran thalai pawl in min lo tlawh tuk a ni lehzel chuan a tiphur kher mai.

Mikhual nula hmuh theih ngei turin tlar hmaah a han fuk pui vang mai a, uluk tawkin bawp a'n khawkherh a, ke a phut hleuh hleuh mai a. A lo lut lam a per ring lutuk chu Chairman-in sawi chhuak hial mahse pawi ati lo. Tlangval leng rei tiin khaw thenawm lam lamah nen a thang vei maw? Mikhual nula hmeltha Rozuali te ho khan han en ula, a pheikhawk atang ngawt pawh hian a duh duh thing thei a ni tih zawng in chiang thawt lo'm ni?  A hmuh zawh loh vang ni lovin a duh tui vang zawk asin. Thingrem zai thei an neih leh neih loh pawh in hre chai em ni? A putea pawhin Dharmendra a hmu tawh mai thei asin!

Ni, U Chheuva hian thangkhat lian vawi tam a lo thlir liam ta. Thangthar an lo tuai a, nimin lawka naupang inkawibah thinte kha nula an rawn ni a, tuikhur kawngah an rawn nui tak awr awr a. An nui ri a reh fel chauh tihin pasal an um nghal a, kawng kawia an rawn lan leh meuh chuan chhangchhenu an lo ni tawh mai thin. He hun inthlakthleng hi U Chheuva chuan vawi tam a lo hmu tawh. Chhuan khat an vul chhung hi rei lo a ti a, a inrin ve hmain a liam leh thin


Tih emah chuan hmu zo lo a ni bik hlei nem! Siampari te nulat laia Damveng nula kha chuan a tum ve hle kha maw. Tunah chuan an fate fa leh chhawng pawh an lo nula leh tawh a, an bulah an pite chanchin a sawi a sawi duh lo mai mai a lawm! Tlangval invawn thianghlim duh mi chu ni lo se Tlangnuam rama thingse buk hnuaiah khan leilung a lo her danglam ve tawh ngei ang. Ni, khami tuma nula thingphur a zui kha chuan a mitmei a hmuh hle kha maw, a uang duh lo mai mai alawm! Tihtak emah chuan, theikelek rah lawh saktu pawh kha tudang an ni hlei nem!

Inkhawm banah pheikhawk ropui nen an mikhual nula zaikhawmmna ina a han a chhawm lut pawh chu teuh ve ther ther tak a ni! Sipaia tangte chauh in an neih theih pheikhawk ropui tak mai bun pha chin chu mikhual nula lungfing chinte chuan dah hniam thuai hek lo, Biak in chhunga a rawn det dan sawr sawr pawh khan a rinna a tiderthawng tawh reng a; chutia a powder diak inhnawih Afghan Snow rim hre pha hial khawpa an inhnim hnai ta mai pawh chu a mak hlei nem! A mawihawih zawng pha chin a lo nih ve tawh avangin zaikhawmna inah pawh chuan a thutpui duh lo ani mai a, a ep lam kilkhatah a ngaih la tawk tur chauhin a inthiat a, mi karah an indet chhawk zek zek mai a ni. Zaikhawm banah hun thawl a awm phawt chuan kawtchhuah lungdawh lamah rik pui sun sun mai tur, Engnge ni vei, hei leh chen a lo in vawng thianghlim tawh a, miin an hmusit phah tlat, vawi khat na reng reng chu chetsual ve rap pawh a pawi lo! Saw, a rawn melh dan atang sawn a tlawm sa reng alawm!

Dim miah suh Chheuva, a hmeichhia zawk mahina cho te chu phung sawh hlawih hlawih mai rawh le. Thangthar engmah hre mang lo te hian an nuihsawh vel che maw? Hmana thinglukam pakhat vanga i mualphona kha tunah chuan a hlaihkhuhna tur hun tha a rawn her chhuak ngei dawn e. Kohhran mitmei i ven vang chauha nula thingphur tlawm duh lo kha i ni a, chetsual ai chuan thinglukham sah i thlang ta zawk kha a ni a, nula laka i zei loh vang ani hlei nem! He mikhual nula hi i tana  bel ruat ngei a ni, he nu avanga kohhran phuar nih chu ana hauh lovang. Fa lu i hloh takngial dawn e!

E khai, ke hmawrah sipa boot a han invuah zet chuan ngaihtuahna pawh a chuan a hnuai ruih mai maw? Zaikhawm boruak pawh a heng zo vek mai! Nula rilru hneh dan hi chu a duh phawt chuan a thiam alawm! Upa Nikhupa te meuh pawhin, “Chheuva meuh han chetsual ve ta chu, a nulain a zir hle ani ang e” tiin an rawn thiam tho dawn. Mipa a nihzia hi khawvelin a hre dawn alawm.

Pathian fak hla saa tui taka mi an zai laia chutiang hlir alo ngaihtuahna chhan chu sipai boot vang vek a ni!
Zaikhawm chu an bang ta ngei mai. Mahse lungdawh lama inpawh mualpho a la rem rih lo ani ang, U Chheuva duh aiin an bang tlai ta tlat a, mikhual nula khalh falna hun a awm ta lo. Mikhual nulate thlenna veng lam meizial a tui thar thung a, an haw tur thlah a tul vang pawh ni chuang lovin meizial lei a ngai tlat. Mahse, nula rual khat chu pawh nghal bawrh bawrh a rem lo. Tum loh hmel takin an hnungah a zui hrut hrut a, a chang lahin a han kal pel ut ut thin bawk a. A han be dawn zuau zuau thin a, a han dir uih uih a, a hrawk atangin a rawn ri chhuak thei lo leh thin. A zah vang leh a zei loh vang ani lo. A la hun lo a ni zawk. Hmeichhia chu an cheng deh thiam a ngai.

Be lovin a chhuah takngial dawn a, an thlenna veng an thleng tawh tlat. Khawnge, tlangval; lungfing pangai ani lom ni, a chet a hun tlat. An hnung atang chuan a han dir uih a, “Rozual….” A ti hman chauh a, fur ruahin a nan huh lung no nal chu a rap pial palh a, a boot ropui a la hmang thiam chiah lo nen, a petek nuk a, tuihawk chu a rap per ta chuai mai a. Rozuali puan thulkhung bih lai chu a berh phung a, U Chheuva chuan a melh run run mai a. Zak tura ngaih chu a ni. A sipai boot vang bawk.

Rozuali te’n an pen zawhsan hnu chuan khaw hmawr favai zingah a va zung to to a, a han inthing nuk nuk a, hniak pherh vungin zanriah bawp man hman turin a haw ta a, A ka chhunga maian bai leh buhchangrum a hnawh luh lai chuan tuihawk a dai per mikhual nula kha a ngaihtuah roh roh a, a hmulthi a ding sung sung a. Biakin petromax chu miin an chhit khalh ang tih mawlh a hlau ber a, sipai boot thar bun chunga Biak in chhunga petromax khai luh chu pui dawn riau in a hria a ni. A kham thuai a, mei engah chuan a sipai boot chu a han thlek a, tap kawmah chuan a han per tlut tlut a. Kam a thuah puat a, Upa Lalbiaka inah petromax la turin a tek chhuak ta a ni.

Sipai boot hian thil a va ti thei em! Mihring nunah hian thil chhia leh tha a va han thleng hnem thei em! A buntu-a zir alo ni!

Entirnan, Kapzova te ang ke hmawra invuah chu ni se, Sachhun kawng an zawhpui kumtluan rinngawt ang a, khawilam mikhual nula hmeltha in khaw member a tih pun phah lovang. Lo vah nan te, buh phurh nan te, lui kal nan te hial pawh an hmang ang a, a ropuizia leh a chungnunzia te ngaihtuah miah lovin zo kawng chhuk-chhoah an rap sawk sawk anga, rei a daih lovang. Tiau lui dung an zawhpui thin a nih vaih phei chuan karlovah a savun chuan a tuar mai dawn a ni. Tui dai pui atan rit an ti deuh a nih pawhin an nghawngah an han awrh ngei ang a, nghawnga awrh chung chuan Tiau lui lipui dum ngun mai chu hleuh kaipuite an han tum ve khanglang ang a, an tla hlum mai ang. An thih phei chuan chuan thil zawng zawng a buai zo ang a, a ruang an zawnna lamah a sipai boot ropui ber chu an tibo emaw a ni ang a, thil a khawlo zo ang. Burma sumdawngin a khingkhat chauh emaw kha vaukam chirh zingah an han chhar ngei anga, hralh sumah pawh hlawk tham a nih dawn avangin a khing lehlam zawngin Tiau lui suar chhia zawng zawng an suar tluan ang a, an tla hlum leh reu reu ang e! Chuvangin, Kapzova te ang chuan bun ve lo law law mai rawh se.

U Chheuva han er pha ve deuh ber chu Hrangliana te lah a buna bun chi an ni silo! A kephah te reng mai chu a malsawm lo zawng hian a kak thu mai a, feh kawngah pawh a hniak hi tumah in an hai lo reng reng a ni, A sam te lah chu a tawngpawng zuah ve nghuang ringawt a, a bal em em bawk. U Chheuva te chuan awmze ril tak neiin asin an zuah ni! Aizawl-a a thianpa, Henry Khiangte chu Beatles zai te pawh a lo ngaithla ve tawh leh an lem te pawh lo hmu ve tawh a ni a. John Lenon-a sam sei lai hre pha ngat a nih bakah an hla thenkhat te pawh sa ve thei sawlh sawlh anih avanga, a sam chu zuah sei ve ngat a ni a. Henry-a sam a sei chhung chuan U Chheuva sam pawh a sei tur a ni ringawt, an inzawmmna a ril em! An naupan laia Pu Thawnga fu an ruk thin lai phei kha chu rei tak a ni tawh. Tih mai mai ani lo.

Henry pawh hi Beatles’ shoe leh kekawr zuih nena Thakthing tlang vela lo tawlh thlu ve zat zat tawh kha ani a, mi namai ani hlei nem! Aizawla a luh tirh chuan Lalrumvunga kha a ni ve ringawt a, tu khaw khain ka ui ka ar an ti lo. Pa lungleng thei ani a, Aizawl nula han khuaikhem tur chuan sap hming neih a ngai tih kar lovah a hrethiam thuai a, Modern a ngai tlat a ni.  Tichuan, sap hming hrang hrang a han pu chin a, a tir berah chuan Stefano a han inti phawt a. Zei phah dawn riauvin a inhria a, in hmeh hleiin a in hre bawk. Mahse vanduaithlak takin tlangval lar tak pakhat hming chiah mai a lo ni a, thlak a ngai leh ta. A thawnthubu chhiar ami Clayburn tih chu a pui riauin a hria a, a han pu leh a. Clayburn LR Vunga a inti mai thin a, chu hming pu chuan a then kual nasa ve hle a ni. Mahse aizawl nula pakhatin Clayburn tih chu Sikulpuikawnah alo nuihpui tak nghek nghek avangin thlak alo tul leh ta. Alfred CH Sailo, Dariano M Pudaite, Sosono L Hmar  tih vel a put kual tak chiam hnuah, a mumang lamah Henry  tih a lo nih avangin a zing tho chuan Henry H Khiangte tih chu a inphuah ta a ni. A thlak leh dawn em kan hre lo. Sipai boot nen a va inhlat ta em!



(A chhunzawmna a awm ang)

Friday, July 29, 2011

Beram bo leh a pu


C. Lalnunchanga

(Camp-na hmunah hian Counsellor-in beram bote hnenah counselling a nei a)

Counsellor      : Aw le, zaninah hian sual ngaihdamna thu kan sawi ang. Kan sualte ngaihdam kan   nih theih nan engnge kan  tih hmasak ber ang?
Tlangval-3na   : Thilsual kan ti phawt ang.
Counsellor     : I va nghawng em, a bilhah i tho thlawt lo. Helai hmun thlaler ram rovah hian kan tawngpawng bengngawng ar mit tet khuan ul ul lo, nanga lova chhimthal bekang puah pawp pawp mai, sakkhi lu ro pawh tluk lo. Tunah in thlarau tan exercise kan la ang. Ka tih ang apiangin ti ang che u. Aw Lalpa, drugs addict-te, zungawl veite kan ni a maw, ti rawh u. (Camper ho an hotupa tih angin an au rual a) A nu leh a pate thu kan awih loh avangin kan chhungten’n Camp-ah min tir luta maw. Kan inhmuhchhuan theih nan maw, mi sual kan nizia min hriattur ang che.
Camper-te       : (Counsellor-in a tih ang zelin an au rual a)
Counsellor     : Aw le, a tha e, ti kha chuan thu in awih tawh ang. Chutichuan, chung lama mi khian Eden huan ka a be lo, he lai pawh hi a be lo. (A nak lehlam a khawih leh a) Helai pawh hi a be lo (A nak lehlam a khawih leh a) Eden huan hnenah kha thu a sawi reng reng lo. (A thin a dek a) Pawnchhe hnangkhai pawh tluk lo, thatna lai reng reng nei lo nang ka unau, eng nge he khawvelah hian i beisei? Tun hun bak hi chu khawngaihna leh zahngaihna hun a liam dawn, Mitkhap kar lova thi thut thei i ni asin. Nuam ka chen ve e i ti maw, khawvel par ka tlan e, i ti maw? Nep thlerh thlerh lutuk. Dendrite ka hnim rui e, i ti elo? Keini chuan kan vanglaite chuan marijuana- tip in tih thin hi chhemtheiin asin kan zuk. Tip pawh kan ti ve nulh nulh ngai lo, Kanza pawh kan ti ngai lo, singtual asin kan tih. A zialin kan zial lo, chilim kan ti lo, vaibel pawh, a chhia emaw, a tha emaw pawh kan ti lo; mau chang hi a hmawr tawnah rual takin kan tan a, chu chu chhemthei a ni a, chumi chhungah chuan a bengin asin kan beng. Han ngaihtuah mah teh u, beng muka liam zawih zawihin, mai mai a na.
                                Miin khawvel hi a pumin nei sela, a nun chan silo se la  (A tawng sual a) He he.. nia, a  nun chan si lo sela a va vannei dawn tak em! Ti rawh u maw? A nun chan silo hlauh sela nie, khawvel hi a zavaiin a ta alo ni tawh ang a, nula no no a han thing ang a, zu thlum tha tha, old monk, a tuitling, director special tih angreng a han in ang a. A duh leh Shillong-ah a duh leh Bombay-ah, a duh duhna hmun ah a zin ang a, Film star nula hmel tha, Prena-i, Kum-Kumi tih ang te lek lek chu a thing zeih zeih tawh mai ang a. In zawng zawng, cement- in lian pui puite chu a ta alo ni vek tawh dawn si a; a duh leh Five Star Hotel-ah a thleng ang a. Maruti nalh tak takin a tawlh zel zel ang a. Car-ah ka chuang peih lo ve a tih chuan, a duh leh bike-in a intlawh chhuak ang a, A.R canteen pheiah duhtawkin speed a han la phei ang a; fua fua…. Han ngaihtuah teh u, a chak dawn hem hem asin, traffic duty-te chuan an lo tiding ngam dawn chei silo. Treasury square-ah mipui lun lai tak pawhin a funte pai a han pet tet ang a, Excise lo duty te hnenah pawh, ‘Khu lai Restaurant-a no khu mi zuk lak teh’ a tih pawhin an hnial ngam dawn lo reng reng. Solomon Cave-a dawr zawng zawngte saw a ta alo nih tawh dawn avangin, ‘Vawiin ka nula rim nan chuan he pheikhawk hi ka duh’ a ti ang a, a duh ber Sneakers a han thlang anga, chutichuan Venghlui nula nge, Kulikawn nula nge, bawngkawn nula a duh duh a rim ang a, nula nu leh pa tumahin an lo be chhe ngam dawn der si lo. A tihtur dang hre tawh lovin a nula rimte sofa dupah pawh e ringawt mah se, hlim takin a ek chu an thensak tho tho dawn. A nuam awm ti tawh u maw?
                                    Mahse, chutiang chu a ni dawn si lo. A ni dawn lo chiang khawp, he thuah kher kher hi chuan ka chiang tawk em a ni. Ka unau, tih tak meuhvin ka hrilh dawt mai ang che, a ni dawn lo. Nilengin in thu zawi ngawih ngawih a, tlai lamah saranga fun, zu.. funte hnih-khat in in ve a, khawvel hi ka vawk lal lenna emaw ti ang ziazangin in arbawm chhe lum mai mai a, huai kawm ka bawle in ti ve khanglang e lo? Keinite chu Atta len vanglai khan chawhtawlhin zu kan inchhawp li ang liau luai va, a in pawhin kan in duh tawh hlei nem, a hawpin kan hawp asin. Mai mai, helaiah in lo khau phar thawven ve hle ringawt a, Atta len pawh in hria em ni? Haflong, Red Rose, Bagha, R.V, huh! Kan vanglaia Atta lena nuthlawi kan han pal phul tak tak mai thinte kha chu aw! Bat theih lohna pawh kan nei hlei nem. Eng nge zawh duh in nei em?
Tlangval       : A nih ka pu, fapa tlan bo kha, eng ati nge a tlan bo kher. An khuaah khan nawhchizuarte an awm lo em ni?
Counsellor     : A… hei hi a Greek twng chuan sawi lo mai ila. Mi thiamte’n an chhui dan chuan: Kha tih lai khan fapa tlan bote awmna khaw lamah khan Total Prohibition an puang ani awm e. A thu hrimah unauvah hian a naupang zawk hian tlanbo mai hi an ching bik a. Isaka fate pawh a nuapang Jacob-a a nih kha tlan bo. Kha tih lai khan Juda-ho zingah fapa tlan bo hri a lenga, kha vang khan tun thlengin thlahtu-ah chian lohna a thleng a, fapa tlanbo zawngin kil tin kil tang kan indap a, helai ram kil khawr thleng theng hian kan lo bawng ta tet tut mai a ni hi. Nang i in hlan thei em?
Tlangval-1 & 2: I tih miau chuan inhlan thei mai zel e!
Counsellor       : Nang i inhlan thei em?
Tlangval 3-na  : Aih
Counsellor       : Aih i tie lo? Eng nge i harsatna?
Tlangval 3-na  : Zu hi chu ka nghei thei mai a, mahse vengte ta awt suh tihah tak hian ka buai leh thin a ni.
Counsellor      : Inhlawh la, lei ve mai la.
Tlangval-3 na  : Ih… i mit sira i melh zeuh pawh ati si a, khawlaia chhuahvah nihkhua hian thenawmte bungrua hi ka melh leh hru mai zel a. An laibu hian ngaihtuah loh loh tur min ngaihtuah tir thin alawm.
Counsellor     : Aw le, rul thlahpa, i thinlungah setana’n hmun a la luah a, chu chuan a tibuai che a, i hur thlawn tuk mai a nih kha. Zahna kawng kal tlang lo chuan i harsatna hi hneh rual a ni lo, savawm zu rui ang mai, i thinlung kha sawizawi a la tul hle a ni. Tunah sihal u-in, aa… uuuuu,… ti rawh. Ti leh rawh. (A tih ang apiangin a ti a) Tunah chuan sakhi hukin, hukkkk… ti leh rawh. Bawkkhup la, ‘muisual ka ni’ ti la, i awm chum vak vak rawh.
Tlangval 3-na  : Aw
Counsellor      : Engtin nge i awm?
Tlangval 3-na  : Ka thaw a hah
Counsellor      : Vut lakah kan vawih ani maw? Pianthar hi thil khirh takaah i ngai a, chuvang mai chu a ni. I pianthar avangin engtin emaw tak i ni huau dawn lo va, i mawng a za mer mer lo vang a, i hmel a lo eng ta vuk hek lo vang. I hmel kha chu tahngai lungpui sa vuan ang nui a la ni reng dawn tho va. A pawimawh ber chu i rilru kha ani i rilru kha. Kraws lam chu hawi rawh.
Tlangval 3-na  : Khawi lama kraws maw?
Counsellor     : Kalvari dama an dah duk, khel pho ata ni chhuah sara Dumaka leh Tita te hnena an khaikanna thing kawkalh kha maw le, ka unau; i chhah em mai.
Tlangval 3-na : Vengte ta it hian kan hawi hruk hruk mai a. Ka hmuh ang zat chu hmu ve chiah la aw… Nang pawh i buai ve tho vang.
Counsellor     : Chutiang mai main keini lei nun kalsan tawh min tibuai ve thei lo. A vohva vohbik nun i tawmpui tur a  ni. Ka hrilh a che, tun bak hi i tan hun tha hawn ani tawh lo vang. I tlai tep, zaninah hian i thi thut thei. Engtin nge ni ta ang le?
Tlangval3-na  : Nang pawh
Counsellor     : Kei pawh a?
Tlangval 3-na : Aw
Counsellor    : Ka unau, i chhah lulai em mai; kei chu van taksaa thuam ka nih tawh hi. Lenkhabuah i hming ziah a nih ve theih nan tun hun lo hi chu i tan khua a tlai tawh ang. Nakinah chuan, ‘Muala mi delh rawh’ tiin i la tap tiau tuai mai ang maw le, Chhaw-kung. Chuvangin ka ti a che, i in hlan lo vang maw? Naktukah chuan i chungah eng nge lo thleng dawn i hre lo, i hre therte lo. Sawmna hnuhnung hi i hnar ngam leh hnar rawh, i va chawh dawn em. I chawh ngawih ngawih dawn ani mai. I la kang durh pup pup ang a, i la huk dum dum ang ti nia !
Tlangval 3-na  : Min hrawk khur khur kher lo la
Counsellor    : Mi sual boral tur i ni a, chu chu ka hmangaih vang chein ka hrilh che ani. Khawngaihna hun i tan hawn a nih lai hian buh seng turin ka feh anih hi. Mawla, nang buh i ni a, kei a sengtu; buhah pawh buh lem i ni, i hria em rul thlahpa? I hmelte hei hui hi, rul thlah aiin zawng thlah i ang zawk. Kan Lalpa tawrh nasatzia kha ngaihtuah rawh, i tan a ni a tawrh i tan, tu dang mah tan a ni lo, nangma tan a ni a tawrh: ka tan a ni lo. Awh khaih! E..aw.. kan pahnih tan ani a tawrh. Kan za atan. i tan, ka tan, kan zavaia tan hrehawm zawng zawng, hreawm tinreng, tah leh ha thial a tuar a, vana a lalthhutthleng hial kalsanin i tan a rawn thi a, nanga Sa-chhepa hian ka ring duh lo ve, ka awih duh lo ve sate-ek e, bal e khak e i lo tihkual kawi sawi ve khanglang elo Zawnga
Tlangval 3-na  : Kei chu ka rin dan chuan….
Counsellor      : Rin dan i nei lo, i mawl em em ringawt mai a ni, rul thlahpa
Tlangcal 3-na  : Mi sual chhandam turin a lo kal in ti si a, chuvang chuan Vanramah chuan luh pawh duh lo eng ang mah ila, min hnuk lut vek tho tho vang tih hi kei chu ka ring
Counsellor      : Nang sachhepa, heti hrima nang nena inthelhthaw reng tura luh dun ai chuan: kei chu leiah ka chhuk leh daih ang.
Tlangval 3-na   : I duh leh chhuak la, i tel lovin nuam kan ti zawk daih ang.
Counsellor       : Min chhang suh, Pathian thu i hre lo ve ropui si. Chimawm hle ringawt mai
Tlangval 3-na   : I pianthar ang zatte chu piangthar ve tawh ila, kan hre ve tho vang.
Counsellor       : Nang hi a ni Bible-in hun hnuhnunga Pathian ngaihsak miah lo, mi ngawhnghawl a tih kha. Chuvangin fimkhur rawh, ka ti a che; fimkhur mawlh rawh
Tlangval 3-na  : E.. Bible chuan thuhriltu der lakah fimkhur turin min ti ve tho
Counsellor      : Nang hi i sual pawh ani lo ve, i a anih hi! A.. i a tak tak pawh a ni lo, i a der anih zawk hi.
Tlangval 3-na  : Nang pawh Counsellor tak tak i ni bik em ni? A der i nih kha
Counsellor      : A tak, Counsellor puitling ka nih hi
Tlangval 3-na : Counsellor puitling i ni lo ve, puitling counsellor i nih kha. A nih leh khawi maw i certificate? Khawi University-ah nge i zir chhuah?
Counsellor    : E.. mi va challenge  ve! Kalvari College chhuak ka nih hi. Kei hi min challenge lo, Pathian i cho tihna a ni. Ngai rawh, i tisual ang, zaninah i thih nan ka tawngtai mai tur asin, i ngam em ni? ‘Lalpa, saw mi saw tihlum rawh’, tiin i chaldarah tak khan ka rawn kawk va ang a, ka sakhi thingchung lawn hrep mai tur che asin. I ngam em ni rul thlahpa? Pawl engzat nge i nih? B.A maw, M.A maw? B.A Georaphy pawh ni la, M.A science  pawh ni la, M.A. phil pawh ni la, Ph.D scientist  pawh ni la, thlarauva hriattir kei hi mi cho reng reng suh. Hla taka mithim, Pathian thu awihlopa; i pa eiruk zara…
Tlangval 3-na : Eh eh eh! Tih tak emah chuan nang pawh i ar ruk chin laia…
Counsellor     : E.. naucha, buai i va cho ve. Huai viaiin i inhria ani maw? Tih tak takah chuan Atta len vanglai pawha…..

Monday, July 25, 2011

Zu khapna dan teh fo hi

Zu khapna dan tih hi zep thu cheng lo chuan, kan titi tui ber leh kan helh em em, kan auchhuah pui nasat, hma erawh kan sawn pui theih hauh loh a ni. Mizoram zaa za kristian tia in chhal ngam hi, lemderna (hipocrisy) nuna kan luh thukzia entirna fiah tha ber chu kum 1977 feb atanga zu sak, zawrh leh in khap burhna (Total prohibition) kan puan leh hman tan kha a ni awm e. Kum zabi thar kan kai atanga Total Prohibition puang hnuhnung ber chu, Mizoram Congress sorkar a ni. A fing tlai anih chuan khawvela fing tlai ber, a ai tlai anih pawhin khawvela a tlai ber ani ti ila kan sawisual tampui awm love. Tlai khaw hnua zu khap thu la buai pui chuk chuk sorkar kan ni a, Mi lung fing chin ina tha an tih loh leh a theihloh tur zia hre reng chunga, Kohhran nawr tawtna atanga inthlan leh huna mipuite duhsakna dawn beisei vanga, congress sorkar in hetia ati mai hi thilmak tak niin a lang. Zu khap burh nachang hre khawp sorkar hawihawm reng reng ke vanchhawnin an tla thin, tih hrelawk ngat sela chu, an tilo tawp tur ania, mahse an hre silo. Eng nge a nghawng? A kum leh november 1998 inthlannah chuan congress chu an chief minister hovin ke van chhawnin an tla deuh phiar ani.

He Zu khapna dan an siam hi mipuite pawh min nghawng nangiang reng a, a nghawng leh a thlen chin pawh kan hria, A thatna tam tak pawh lo awm mahse, a khawi zawk hi nge buk rit zawk anga, a eng hian nge ram khalh ngil ang tih erawh chhiartu leh mipui kutah dah mai ang. Ram leh hnam dang pawhin an lo ti ve tawh a, hlawhtling tak tak an awm kan hre lo. Entirna pahnih khat lek lo tarlang teh ang. 

Europe, abikin England atanga USA rama pem hmasa, Protestant turu thlahte chu Middle-west leh south lamah lo nei leh ran vulhin an khawsa ber a. Heng pem hmasa, mi hlun (old stock) inti ho, hnam induh tak, fir taka Puritan ho zirtirna kenkawh duh ho hian hnam dang, pem tharho, mi hnuahnunga an ngaih, khawpui leh thilsiamna hmunpuia cheng, abikin Irish, Italian leh German mi, Protestant pawl pawh ni lote chu mi hnawksak, zu in ching leh nawmchenna nuna inhmang mi nia an ngaih avangin, an zalenna khuahkhirhsak dan an zawng a. Protestant pawh chuan 1869 khan, National Prohition Paty an din phawt a; kum 1895 khan Anti-Saloon League of America an din leh a. Kum 25 zet beihpui an thlak hnu chuan 1919 khan US Congress chu an zu sak leh zawrh khapna dan 18th Amendment, a bill pu luttu Volstead hming chawia Volstead Act an tih chu an pass-tir a, a kum leh chuan an hmang tan a. Kum 13 zet an beih hnu chuan an hlawhchham der a, zu khapna dan chu 21st Amendment-ah an hlip ta a ni.

Hemi chhung hian zu a let tamin a pung a, zu rui vanga accident tawk a let 647 (percent) leh zu tha lo ina thi a let 700 (percent) dawn laiin an pung bawk a. ZU atanga chhiah sorkar hmuh tur zawng zawng zu zuarte kutah a luh tak veng atangin nawhchizawrhna, pawisa inkhelhna (gambling and betting), nawmsip bawlna in te leh thilsual tihreng tihna hmun a pung nasa em em a. Politician ho leh Police-te chu zu zuarho kuta awm an nih avangin thu buai hla buaiah misualte chu ngam rual anni tawh lo. Chung lai chu alawm, mafia khawpui Chicago chuan "America khawpui zinga corrupt fai thak"(the only completely corrupt city in America) tih dihhmun a luah hial a ni.

October 24, 1929 a sumdawnng inpui Wall Street-a New York Stock Exchange nghawng chimtu zinga pakhat chu zu khapna vang niin thenkhat chuan an sawi bawk. Hei hian khawvel sumdawnna a nghawng chhe nasa hle a, indopui pahnihna intan thleng khan khawvelin a nghawng a la tuar a ni. Hemi hun chhung hi Chhiatna Rapthlak Hun (The Great Depression) an ti hial reng a ni.

Ram intodelh ber USA mahin zu khap chutiang khawp a chhiatpui dan chanchin Ram pakhat-a ram hruaitu lu ber pawhin kan hrelo nge kan palzam mai mai nge, kohhran hi kan ngam lo zawk? nge politics vang bawk em ni? Hei lo i lo en teh ang "Congress Chief Minister Lalthanhawla leh a hoten an tih ani a, an fakawm hle. Sorkar a Minister leh hruaitu lawk tak tak thlengin, tuman zu khap chu tha an tilova, a hlawhtlin an ring bawk lo. Kohhran hruaituten an nawr nasat em avanga an tih a nih thu an sawi vek. An sawi zel dan chuan, khap tura nawrtu puithiamho pawhin a hlawhtlin an ring lo. Mahse, zu khap tura sawrkar nawr kohhran hmaa an lo intiamna chu hlen ngei an dih si avangin,. puithiamho chuan an hmel hemmna tur veng ranin, hmai phih fai nan, sawrkar an khap luihtir a ni. Puithiamho leh politician hovin zu politics an lo khelh dan hi namai lo tak asin" tiin L.Keivom chuan Zoram Khawvel tih ah a tarlang hial.

Ngaihdan tam tak min neihtir a, a chunga ka tarlan hi ram dangin an lo tih ve tawh dan entirna mai ani a, a that leh that lohna sawi tur tam tak a awm ngei ang. Kan ram neihchhun Mizoram, hnam naupang tak leh ram dang dangte tihdan a tha emaw tha lo emaw, copy zung zung thin hnam hian Zu khap burna dan hi awm talo se, engtiang chiah in nge ngawng a neih ang? Tam tak chuan he Dan hman kher ngai lo hian control tum ta zawk se; mimal tin duhdan nise, a chin tawk leh awm tawk erawh inzirtirna khauh takin awm se ti duh pawl kan tam. Sawi zawh sen anilo, kei ka mimal ngaihdan ve mai ah chuan he Total Prohibition hi awm lo se, zalen takin awm se, a kum hnih khat ah kan buai pawh ani thei, mahse a rei ah zu kan in thiamloh na bik tur awmin ka hre lo. 

Thursday, July 21, 2011

Awi karei, Lucknow !

Ruangla Sipai kan tih mai, Army Medical Corps-ah a nawlpuiin kan tlangvalte an lut a, an hmunpui leh training-na Lucknow lam chu kan hawi thup a, rinnaa kan khawpui lar ber Jerusalem pawh hun engemaw chen chu a lan daih a ni. Khaw lama an kalsan an chhungte leh bialnuten an tana hualhimna kut leh malsawmna dila, chung lam an tihbuai apianga khaw hming an sam mathlawn loh chu Lucknow a ni. Abikin, nulaho rilruah a khat liam a. An inchhuih palh emaw, thil an tihpalh reng reng emaw, buh den khaihlak lai emaw chang hian tawng chang laknaah 'Awi, ka rei! Lucknow' an tih thin avangin, 

A thang thui kher mang e, tlang tinah,
Siali lungleng tuar zo lo mangang chuan in,
"Awi ka rei ! Lucknow" an lo ti e

tih hlate hi tlangvalten an lo phuah ta hial a ni. Nula te lah diau duh hek suh. Zahte chu pumah ngaiin,

Thiani, kei zawngin ka tuar zo lo,
Ka vulmawi'an zaral min relsan si a;
'Awi karei ! Lucknow' tih ka bang dawn lo

tiin, tlang rel pawh dawn chang lovin, an kuk ker ker mai a ni. Chu chang a ni hlei nem. Kumpinu lalram chhana lo zuang chhuak tura thu chhuahtu Aizawl Bawrhsap thleng chu mawh puhin,

Bawrhsap lungliana'n i rel sual e,
Chhailai chaltuai sam ang ka then tur reng hi,
Ka dawn hian lung reng a awi thei lo

tiin a thla an hauva, an chhuahchhal hial a ni.

Sipaia kal tate chuan Lucknow khawpui an zukthleng a le ! In sang pui pui, insi khup mai leh Station-a rel kawng thlur tam tak kanna tura thir leilawn sang an dawh thuahte chu ropui tiin an thlir vel a. Kil khatah khuaibu an han hmu a,

Hei hi maw ni, Lucknow khawpui chu!
Ka hawi vel a lei sangpui kailawn zawng hi,
Kham khuaipui lawi nan an mawi reng e

tiin an zinga pakhat chuan a han chham chhuak a, rel station chhuat mam laiah chuan an han chai ta suau suau mai a. Chutah, an hruaitu Gurkhali bel hnih bel chuan, "Nangmahni Lusei, hla sa mai mai, Sipai chu hetianga lam tur nilo maw le, Kal chu hun tawh maw le" a han ti that that a, an kal leh ta chauh a ni.

Zopa zuauna ber chu minu lakah a ni. Kan hla atanga teh phei chuan khawvela tahbelh ber hnam zinga mi kan ni ngei ang. Aizawl an chhuahsan dawnin sipai an lak tharte chu a pawl pawla thenin pawl khat zel hruaitu atan Mizo tawng hria Gurkhali bel hnih bel an dah zel a. An chhuah dawnin thenkhat chu an bialnuten an rawn thlah ngei a. Tlangval pakhat chu a bialnu nen indin chilhin a tap pur mai a. An hruaitu Gurkhali chuan, "Nangni Lushai tlangval ni lo maw? Tap reng mai, Chalaw, kal tur chu ni maw le" a han ti a. A bul lawk a tlangval dang, inhnit hlawp hlawp lam chu hawiin, "Nang pawh, Lushai kha, lunglen thu sawi zo tawh maw? Lo kal la, ni chu sang tawh, kal hun ni tawh maw le" a han ti bawk a, an chhuak thei ta chauh a ni. Pa lohna zawngah chuan Zopate chu pa lo tak tak kan ni ! Tap reng mai.

Lucknow-ah rawngrut training an han tan a, lu an han meh kawlhsak a, Boot rit tak an buntir a, dal leh roti in an han chawm a, lam an zirtir a, thih thlenga ram tan leh chhana huaisen taka hmelmate do turin an han fah a. Mahse, an lunglenna erawh dawi at leh meh kawlhsak thei ani si lo. Lunglen vang ringawt leh lehkhathawm an ziah duh vang ringawtin thenkhat chu damlo derin, chawlh an dil thin a. Tlangval pakhat lungleng pawhin daktor a va rawn a, damdawi a lo chawh a, mahse a dampui lem lo ani ang,

An sawi Lucknow zawng kan thkeng ta e
Lunglen vangin Daktor babu ka rawn e,
Tarpintel min pe, ka dam thei lo

tiin a phuah hial a ni. 'Tarpintel' hi Saptawnga 'turpentine' an tih hi a ni. Tarpintel a zun ngai lunglen chul dam tum chu, a khawlh bawk ani.

An han awm rei deuh hnu chuan mi ningkhawng leh tawngte pawh an rawn hre ve deuh deuh a. A huhovin an leng chhuak ziah thin a. Bialnute hnudawm (brassiere) tur leia an bazar chang chu an hmuhnawm thin hle awm e. A zuartuten an size duh zat an zawt ngei a, an hre lo ngei bawk a. A len dan awma an hriat angin kut zungtang bawrin boruak an han hum a, thil zuartute pawhin a tawk awm chu an lo hre ve mai zel ani, an ti. Tlangval pakhat pawhin ni lengin a ngaihzawng zungbun tur a zawng a, a tawk awm a hmu meuh ta lova, beidawng takin ti hian hla a phuah ta ringawt mai a ni.

An sawi Lucknow zawng kan thleng ta e,
Thangngovi khan ngun kual min chah zuk nia le !
A bun tawk ngun kual a vang mang e

tiin

Lucknow leh hmun  hrang hranga training la te hi ram hrang hrangah kal chhuakin, hming tha tak tak an chher a. A then chuan Singapore an han thleng a, Japan ho man zingah tel vein, Netaji Subhas Chandra Bose hruai INA sipaia rawn tang haw tate pawh an awm nual a ni. A then erawh North Africa leh Middle East ram hrang hrangah an kal a, ke ngeiin Ran thianghlim an zuk rap a. A tam ber zawk erawh Burma ramah Japan umin kan hnam tan hming chhuanawm an chher a, khawvel history ral ngai lo tur hniakhnu zahawm tak an hnutchhiah a. Hnehna changte an lo kir leh chuan, sum leh pai leh thiamna chi hrang hrang an rawn hawnte chu hmangin kan ram leh hnam thut an rem a, eizawnna ngelnghet zawk mi tam takin an din phah ta a ni. Zoram chhak leh thlanga kan dinhmun zel kan thlir chuan, Kum 50 chhunga ram leh hnam hruaitu pawimawhte zinga a tam ber leh thu leh hla leh simdawnna lama kan mi chhuanvawr tam tak chu sipai bang an ni.

Thu thenkhat lakna :

Zoram Khawvel 7
© L. Keivom, 2001
MCL Publications
Khatla, Aizawl 

Sunday, July 17, 2011

Ka zinkawg chhuk leh phei III-na

.....Tluang takin kan tlan zela, chawhnu lamah chuan Guwahati chu kan thleng thla ve rawih a, motor min sawp chau(h) chu thukhat nise, zan lamah keini pawh kan lo insawp vei rawl bawk nen, a chauh thuahhnih hle mai. Taxi laiin Mizoram House ah chuan kan in vawm lut ve rawih a, tlemin a zia deuh. Amaherawh zawng a tuk tlaia Train a, ni hnih leh zan khat meuh chuanga, kan thil tawn tur leh thleng tur erawh ka ngaihtuah pha hauh lo. Lo hre lawk ngat ni ila chuan... Train ah khan ka chuang lovanga, ka duh ber Mawitei pawn min thlah kher a ngai loanga, khatiang thil pawh hi a thleng lo tur, mahse kan hmalam hun kan hre silo...


India ram khawpui hi kum 2000 velah kan lo chuangchhuak ve tawh a, mahse kum khat emaw lek awmin kan haw leh mai a, Tichuan zirna sang zawk leh hawp khawp kan thar tam deuh law maw tiin Neihthinglungkhawng tak meuh meuh in, College kal turin kan in hawl chhuak leh ta ani. Phai khawlum tawrhlel awmzia leh khawvawt ina dim baksak lova min han nuai leh tur tih hriat lawk phei chuan peihawm loh tak ani. Mahse ei hmuh duh chuan a sur a sa hnuai a, thlan tlaa kan thawh miau loh chuan dinchhuahna a awm hlawl silo. 


Tichuan, Zankhat nana chu tiin 'dormitory' ah kan riak hota kha ania, zirlai leh hnathawk haw turte leh chhukthla mek te an awm nual a, a hlimawm phian mai. Mahse, he hun hi Mawiteii te nen kan inthenna hmun tur a ni erawh chuan min ti lungngai hle. Guwahati ah hian a u te lehkha zir ve tho an awm avanga lo chhuk thla ve an nia. Hun kha leh chen kan lo inhre tawh a, mahse hetiang ang hian kan in kawm ngai lova, kan in nel ngai hek lo. Kan tum leh beisei ang ani lova, khatia hun reilo te kan hmang dun kha, kan tan chuan a hlu a, han inthen nghal mai tur atan chuan a pamhmai deuh lua chu ani. Zinkawng tur a thui zualin, a khawhar thlak dawn khawp mai le..


A tuk tlai lampangah chuan ka kal a hun dawn ta, vawikhat chauh tal tiin a thiannu nen chuan min rawn thlah a, a ni, inthen tura inthlah chu a har khawp mai. Mahse ka kal ngei a tul si, phone no te kan inpe a, inbe chhunzawm zel turin thu kan tiam duh a nih kha; inngai leh in thlahlel takin a tawp nan tia kan han in fawp te kha nimin mai thilthleng niin ka hria a, hun erawh a kal ngaiin a kal muah muah a, tumah nghah anei silo.


Tichuan Train station ah chuan keimah chauhin ka thu a, Times of India newspaper hlai pui chu ka keu pharh duai duai a, kan train tur an delay vangin darkar chanve dawn lai chu nghah a ngai ta anih kha. Hawina lam apiang ah hian vai, vai, vai hlir hi an tlep tuar a, dinglamah hawi ila, vai; hnunglamah han hawi leh ila, vai  bawk. An chikim lutuk kha an hmuhnawm linglet zawk hial emaw tih tur ani. Kutdawh ho lah, a hmei a pa, a te leh nau, nutling leh patling thlengin pek sen rual loh hi an zi nuaih nuaih a; rethei leh berh ve tak tak, chaw tha hmuh loh avang chher tih hriat ngawih ngawih te kan hmuh meuh chuan ngaihtuahna erawh a kal thui khawp mai. 


A tawp ah chuan kan nghakchhuak ve ta hram a, ka in vawmlut a, kan thu fel deuh chauh tih chuan, ka hawikual thuak thuak a, vai bawk anlo chuang leh thup mai, a hahthlak dawn mange ka ti nauh nauh a. Tukverh bulah chiah chuan seat ka chang hlauh maia, tlemin a zia deuh; minute nga pawh a tling lo, kawngka lam atang chuan phung rual ni awma mawi hi an rawn lut ta sup sup mai, Vai pa mixed a lo thleng phei hmasa ber a, a dawt ah chiah chuan kuhva leh eng ilo zuar, pan pan pan, mitha pan, zarda pan, ti chunga a nghawng hmalama thil awrh duah mai nen. Thenkhat lam atangin chai chai, garam chai an lo ti phei lauh lauh a, eng ilo, lehkhabu leh chanchinbu zuar atanga puri leh eng eng emaw zuar an in sul pel zung zunga, ka tan chuan thil mak niin a thar vek ani. Kan train chu a tut ruai ruai a, thil zuar ho pawh an tum thla sang sang a, tichuan tum lam pan chuan kan kal ve ta muah muah mai ani.


Ka chuanpui te erawh an lo fel phian a, vai chhia leh phakar tia kan lo koh thin kha, an nih loh zia te ka hre chiang telh telh dawn chauh niin ka hria. Ni hnih leh zan khat meuh han chuan dawn chuan, a huphurh awm khawp mai. A hmasa ber atan Suitcase leh bag ilo tawn nan tiin an chain zawrh chu vai dangin Rs. 20 man a an lei kha, lawm takin Rs.30 in kan han leisak nghal pang a, vawikhat bum in ka awm ta phawt. Tichuan zial zu mi han nih takah chuan, tiin train chhunga, an zawrh kual Gold flake cigarette chu, cheng 35 in ka leia, pawn aiin a to zawk tih chu ka hre ve a, ka pe ve mai. Seal ve thlap ania, Ka han hawng chu, gold flake chu khawiah; capstan tih leh No.10 tih ang vel mai mai a lo nia, ka thinrim lutuk han umzui ka tum chu a lo pilbo hman tawh, a vawihnih na bumin ka awm leh ta. Station dang dangah kan chawl zeuh zeuh a, kan tlan thui telh telh a, train chhunga veivak an awm meuh tawh lo, a tawi zawngin sawi mai ang, tluang takin kan kal a, zanah erawh mut chu ka muhil thei chiah lo.


A ni hnihna ani ta; a ninawm tan ta khawp mai, mu chungin khawhar dal ah tiin hla ka ngaithla mai mai a, kan compartment tawhtirh lam atanga, piangsual keibai, kal tha thei lo kutdawh (cripple and handicap) lo bawk vak tawk tawk chu kan lam pan chuan a lo kal a, ka lo en renga, ka khawngaih deuh tlat mai. Ka zawn alo thlen chuan, pawisa nawi tlem azawng ka lo pe ve a, engmah sawi lo chuan min kal pel mai a, ka beisei chuang lo nain, tawngkam leh chezia engah mah lawmthu kamkhat te pawh sawilo leh ti lo chu, mak erawh ka ti deuh. Ka hmm liam ve mai a, mahse a hnu deuh chuan ka ve en phei leh kher a, bawkvak tawk tawk chung chuan a dawh phei zel a, mi pakhat hnih vel bakin an pe lo, chutih lai chuan station pakhat ah kan chuanna Rel chu a ding ruai ruai a, reilo te a chawlh hnu chuan kan kal leh mai dawn a, a tlanchak dawh chiah tihah chuan, kutdawh kebai leh piangsual, bawkvak tawk tawk kha a tho tharh a, kawngka atang chuan inthazo fahranin a zuang chhuak ta mai anih kha; ka ngei lutuk leh mak ka ti lutuk kha... kutdawh thenkhat hi an lo heti ani maw? tih ngaihtuahna te min neih tir hial a. A vawi thumna


A tawp atawp ah chuan India ram khawpui tia an lo sawi thin, Delhi chu ka thleng ve ta reng mai, ka bungrua a tam lo bawk a, ka zangkhai phian. Ka u te lo awm tawh sa ten, station ah min lo hmuak a, auto rickshow kan laa, haw lam kan pan taa. Ka simcard a roaming loh avangin, engang pawhin khawhar leh lungleng mah ila, inbiak ngaihna a awm lo. Ka thlen velah ka lo phone nghal ang che tia (duh beri) ka tiam kha ani a, tih zawh vat vat kha ka nghahlelh ber ani.


Hmangaihna hi vawikhat inhmuhna ah a piang thei an tih hi a ringlo berte zinga mi ka ni ngei ang, khatih hun lai khan, a ruk chuan lo duh em em mah ila, ka hmangaih leh hmangaih loh erawh ka hre phak lo, mahse tunah, hetiang thil a han thlen takah chuan hrilh nawn erawh ka ngai lo. Amah avanga hemi hun chhung reilo te pawh awm harsa ka tih kha kei ngei pawhin a mak ka tia, ka lo beisei ngai lo a, amah hmu thei lo mah ila, a aw hriat erawh ka nghahhlelh ber ani.


In kan thleng deuh chiah a, ka chawl hman lo, ka u phone chu ka chhuhsak a, a no min pek chu ka va dial nghal a, an pick-up mai lo a, ngah har ka ti tak zet ani. A tawp a tawp ah chuan min lo chhanga, min chhangtu aw erawh midang a ni, Mawteii aw ani lo, a thiannu aw a ni. "hello" Vid-a ka nia, 'aw, nangmah i ni maw? i thleng tawh ami?' tiin min rawn zawt a; aw, thleng tawh e, 'khawnge mawiteii, a awm em?' ka lo be lawk teh ang, khawngaihin' ka tia, min chhang lo, ka zawt nawn leh a, 'mawiteii chu ka lo be lawk ang, a awm em?'  channa ka dawng chuang lo, a tawp atawp ah chuan, 'Vid, pawi ka ti tak zet ani' tiin min rawn chhang a, 'Train-a kan rawn thlah che khan, Station atanga kan haw lampang khan in kan thlen hmaiin motor accident kan tawk a, hei damdawi inah kan awm mek ani' tiin min rawn chhang a, mak ka ti lutuk leh ka awih lo lutuk kha, ka tawng a sehchilh nawk nawk a, chuan engtin? tiin ka zawt nghal a, 'kei chu ka hliam na lutuk lo e, mahse..'. "mahse engtin, Mawiteii chu engtin nge a awm, engtin nge a awm?" ka zawt nawn sek a, a chawl deuh vang vang a, a rei lutuk, a rei ka ti takzet "Mawteii chu a boral, a thi...."  


Eng nge ka tih ka hre lo, ka phone ken lai chu ka thlauh a, ka lu chu a vir muai muai a, ka nghilhdup a, ka ding tha thei lova,  ka hriat hnuhnun ber chu, chhuat-a ka tlu turin ka ban ka sawh rirawp kha ani......

Tuesday, July 12, 2011

Ka zinkawg chhuk leh phei II-na

Hnuailam nawrna a chak tak em avangin, kut lampang ah pawh a rawn tham na tial tial a, dar-a bah liam mai mai theih ani tawh lo, a huang chin pelh in, a dam lampangah a vak thla tan taa... muhil der chu kaihthawh an har anlo tih kha alo dik ni ngei tur ani. Ka thiam neihve chhun leh thian te lo experience na zawng zawng nen tankawp angai ta, Zan lam thil a nih vangin inthlahrunna erawh ka nei duh bik hauh lo. Tukverh bula thu a nih avangin a hmel pawisawi lo ngaihnobei tak chu zan thla eng hlei hlei hian a rawn a rawn belhchhan ni awm a mawi ani. Lung a va han dum tak em. A koki a ka kut dah chu zawi muangin ka la thla a, a hnunglamah zut thlain a brazier chu ka nem phelh a, a harh lo.  

Min haw lova, kei pawhin ka haw hek lo; aw zinkawng nuam chu avan ni tehreng em. Chintawk hre loin ka kut chu a nghawng lam atanga zut thlain a vak thla leh tan taa, a awmna a hai lo chiang hle mai. (chhiarkan mai rawh helai chu; nih loh chuan i beng hup rawh) A awmbawr chu a khal thain a bra chu a koki atang chuan ka kut leh lamin ka phelh thla a, a hnute chu a mum thain alian tha hle, a hmur chu ka khawihsak niap niap a, a rawn rum tiah tiah a, ka chawl deuh dat a, mahse ka chawl rei lo. Hnuai lamin min rawn tur ut ut tawh a, thisen a lum pap pap a, thawk a rang ta, zanlai ani tawh a, meng reng an awm tawh lo. Ka duham telh telh a, a muhil tui deuh deuh a, a nuam telh telh a; aw! mi vannei ka va han ni tak em!

A hnuai lam pangah ka tlathla a, a kekawr kawng hren ka phelh meuh chuan, a rawn rum chhuak leh tiah tiah a, ka ban ah nget leh zual chuan a rawn chelh a, ka tangah chuan a rawn bei thlawp a. Ka kuah lo phal lo, a tangnem leh a taksa lum ther ther ina min pawmchial hnu chuan engdang sawi angai lo. Ka engkim min fanchhuak niber hian ka inhria. 'Vid, a mak i ti ve em? hetiang hi ka lo beisei ngai lo asin' tia zawite ina a rawn phun chhuah chu ka beisei loh ang erawh anilo; "kei pawh ka beisei bik lo asin". "Hetia ka awm avang hian hmeichhe leplerh ah leh awlsam ah chuan min ngai suh ang che" a chawl deuh dat a, muangchangin ka awm atang chuan a tal chhuak a, a jeans kekawr ka phelh, a zipper ka zipthlak dawn lai chu, ka kut chu a rawn la chhuak a. Ka chhang lo a, ka dang hek lo, muangchangin a lo hawi chhuak a, ka mit ah tak min en a, duhawmna lalnu ava han ni tehreng em! A biang tawn ah chuan chelhin, a heh sen no hiam ah chuan zawitein ka fawp ta a.. ka fawp leh a min chhang ta. Zanlai mahnise a zak in a kimki tih ka hmuthei riai riai a, mahse a tha ka ti telh telh si.

Khami zan kha ka tan chuan thil chhinchhiah reng tlak ani. He hringnun Hmangaihna tia an sawi ka tan rahbi thar leh ka bul  tanna a ni a, a tawpna erawh engtin nge tih leh tuin nge khar ang tih zawng ka hre lo. Kohhran phuarna tur em zawng kan thlen dun ta lo, Bus chhungah mah nise, kan ram Politician ropui tak tur kan siam teuh hle mai. Khami zan kha, nie ka tan chuan a hlu a; hreawm chang leh chauh chang, manganna ka tawh lai a, min hnemtu tur leh chakna thar min pe thin tu tur ani tih erawh ka beisei lawk lova, ka hre lawk bawk hek lo.

Ka lo chhing ve sek aniang, ka harh chu ka sana kan en chu Dar 8:30 dawn alo nia. Siamtei chu ka dar nghenchhan chung chuan a lo la muhil a, tih harh ka hlauh avangin ka chesawn duh loa, a hnunga a thiannu pawh a lo harh tawh a, nizan lama a ruih avangin a thophang hmel chu a lo pe chhe ve hle a, phung hmu ang maiin a mitmu  lian zet chuan min lo en kura. Zinglam mah nise kan phuzuk thei alawm le! Tluang takin kan tlan zela, chawhnu lamah chuan Guwahati chu kan thleng thla ve rawih a, motor min sawp chau(h) chu thukhat nise, zan lamah keini pawh kan lo insawp vei rawl bawk nen, a chauh thuahhnih hle mai. Taxi laiin Mizoram House ah chuan kan in vawm lut ve rawih a, tlemin a zia deuh. Amaherawh zawng a tuk tlaia Train a, ni hnih leh zan khat meuh chuanga, kan thil tawn tur leh thleng tur erawh ka ngaihtuah pha hauh lo. Lo hre lawk ngat ni ila chuan.....

(chhunzawmna a awm ang)

Saturday, July 9, 2011

Ka zinkawg chhuk leh phei

May 9, 2006, tlai dar 4 vel a nia, Thuampui ah Bus changin ka nu nen kan Bus lo thleng tur chu kan changa, rei vak lo kan nghah hnu chuan alo thleng ve mai a. Mizoram  han chhuahsan dawn meuh chuan a lunglen thlak nameuh mai. Kan chhuak, kan kal liam dawn tihah tukverh atangin ka nu chu ka va bye bye a, mahni chauh a ar khaw thim dai tura min ngaih vang leh rei tak inhmu lo tura han inliamsan dawn meuh chuan, a har ani ang. Ka nu mittui chu dan rual lohvin min bye bye pah chuan a far zung zung tih ka va hmu thei a, mipa mah ni ila ka mittui chu a parawl ve kuang kuang thei nia. Aw nute zawng an van han hlu tak em! 

Night Bus chuan hi a hahdam thlak zawk bakah zankhua a chuan tur a nih avangin Sumo chuan aia thlang ka ni reng bawk a. Mak tak maiin ka vanneih vang nge, kum 5, 6 kal taa a, ka class-mate thin, a ruka kan lo star ruk ve em em thin; mahse ka chan phak loh; ka thiantha ber Chass lo nita kha a lo chuang ve tlat mai a, chuta kar in ka bulah, ka bul ngeiah chuan, a va mak em! Hun liamta ah kha chuan thianpa ta anih vang khan, kan inbe ngai lem lova, amaherawhchu chiang takin kan inhria. Mak kan van han ti dun em! Mahse a thiannu nen chauha zin tur an nia, Sawi tur a ngah in, a hlim ve hle tih ka hre thei mai a, kei erawh zawng ka hamhaih em a thil han sawi tan vak dan tur ka hre lova, mahse zankhua a nih dawn vang erawh chuan a rukin ka hlim khawp mai.

Aizawl kan chhuahsan fel vel tawh ang tih ah chuan ni a tla dawn ruai ruai a, boruak a nuamin, tukverh atanga thli lo thaw lut heuh heuh chuan a sam chhawl leng chu a chhem heuh heuh a, ka mitsir in ka va en leh zauh thin; a duhawm dan erawh a ngai reng, a biang tai tek mai leh a heh sen no hiam te leh ka lam benga thli lo thaw ina a rim a rawn chem te leh a hmel pawisawi lo leh a duhawmna te chuan ka lairil a tikhur der der thei hial nia.

Khatih hun lai khan, a ruk tak chuan ka lo duh ve em em thina, mahse ka zei loh em avang khan ka thianpan min chan khalh kha ani renga, mahse a ruk tak chuan min duh ve emaw chuan ka hre thin. Hun kal tawh chu hun kal tawh ani, tun hun hi ani pawimawh ni ka ti rauh rauh a, eng eng emaw sawi pah chuan hun kal tawh a, kan thil tawn te kan sawi dun a, kan hlim hle mai. A thiannu erawh Motor a ruih deuh avangin a muhil thunga. Sana ka han ena, zan dar 9 a pel tawh a, aw hun chu a va han kal chak em! mahse hun liam taa thilthleng erawh sawi zawh vat mai chi anilo. Driver lam cabin-ah chuan hla muang fan raih mai hi a ri riai riai a, thenkhat erawh an muhil hlawm tawh a, meng erawh anla awm.

Kha Higher School atanga kan zir chhuak zo kha, rei vak lo an inkhawp hnuah hmundanga an awm avanga inthen annih thu a sawia, ka awih chiah lo. Mahse ka awih lo phal hauh lo thung. Ka zei loh luat avang hian ka nakruh bo pakhat hi ka chan tam tawh a, tunah zawng he hmeichhia ka lo duh ruk ve em em thin kha, ka sezawl chhuah dawn hauh lo. Kan tlan thui ve ta fu ani ang, rei lote zun ram thiarna kan neia, kan kal leh nghal maia, kawng erawh a kawi kual ta fu mai. Duh aia thui thlek a awl dawn ta khawp mai, taksa leh tisa lum nena innek han innek tak ah chuan, kan inhaw lo tan dawn tlat mai, ka va han awih lo em. Sawi tur a vang tan deuh naa, mahse kan inhnaih deuh tial tial a, dinglam a han kawi paha, a tangnem leh nau chaw peknaa min han nawr deuh na na tak erawh chuan ka thle tha duh ta hauh lo. Mut chhuak niawm fahrana ka kokia a lu a rawn dah hnu phei chuan ngaih a ngam ta sarh mai. A muthilh chhuah vang erawh anilo, hei erawh ka hria.

Hetiang thil han tawn hian mipa nih ve chuan Pulpit leh sermon lam dah tha a bawh thut polocy han apply hi awlsam ve deuh a nia. Zan a rei dawn tial tial a, passenger dang te pawh an muhil hlawm tawh niin alang. Kei erawh ka mut a chhuak mai nilovin hnuailam nen a harh tial  tial a, tawng erawh ka insum a, kut erawh a insum thei ta lo thung. A muhil bik lo tih hre reng mah ila, kut erawh a vak kual dan dan a, a biangno hliah a, a sam lo uai thla te chu tukverh darthlalang atanga thla engin a lo chhun te chu a lang thei riai riai a. A beng lamah ka hui chhoh sak a, a dar lamah ka kut chu zawimuangin ka bang liam taa. A rawn che deuh talh talh a, vawt ti niawm tak hian min kuah a, a bula Showl chu ka laa, ka sintir taa. Ka en ngawih ngawih a, he thil thleng hi ka va han awih lo tak em! mahse, mahse a thleng dik si ani.

Hnuailam nawrna a chak tak em avangin, kut lampang ah pawh a rawn tham na tial tial a, dar-a bah liam mai mai theih ani tawh lo, a huang chin pelh in, a dam lampangah a vak thla tan taa... muhil der chu kaihthawh an har anlo tih kha....

(Chhunzawmna a awm ang) 
A thui dawn em mai, rek bung lawk mai ang..


NB: "Ka zinkawng chhuk leh phei" ka han ti ngawt a; Kan kal lamah a chhuk zawngin kan kal a, a thlen dawnah a chho tawh mang siloa, a phei ka ti ta mai... :)

Twitter Delicious Facebook Digg Stumbleupon Favorites More