Ka haw dawn!

Kan ti ve bek bek a, kum 6, 7 a lo ni ve ta reng mai, Zirna sang zawk kan paw chhuak ve dah lawm maw tiin Mizoram chhuah san in Hmun danga kan han awm ve a. Mifate ang erawh pha lo mah ila, mahse a ningkhawng chu kan hmu pha ve hram hram a, Hlawhtlinna kawng zawh harsat zia leh Mi fate hian eng ang chiah hian nge Hna an thawh a, an zir han hmuh hi chuan, mahni-ah duhkhawp lohna a nasa thei khawp mai. An ke chheh kan hmuhpui a, kan ram neih chhuna kan thalai te nen han khaikhin phei chuan Thiamna lamah rual-awh a na duh khawp mai.

Mizo Thalai te hian engtik ah nge ‘Hna thawh’ awmzia hi kan hriatthiam ve ang le aw; tiin duhthu ka sam ve thin a, Eiru tun tun chunga dawhkan a hnathawh aiin dik tak leh fel taka bankhur laih hi a zahawm zawk zia engtik ah nge kan hriatthiam ve ang. Hna thawh peih loh vanga, hna a vâng kan han ti thla zen te leh hna neilo, a pawl zawnga kan han ding te hi hnam dang te hian min hria ang tih a hlauhawm takzet a ni. Kan khaw hawi zim luat ah sawrkar hna chauh hi em ni ‘hna’ kan tih dawn, Post pakhat za chuang in kan in chuh luih luih a, kan thiam anih chuan khawi hmunah pawh hna thawhsen loh a awm tih hi i ring in i bawhzui ngam ang u, Kan ram zim te chauh beisei lo hian, I chhuahsan ngam ang u! Nge lehkhathiam (a hming chauh) a BA, MA val inti hi Vairengte pel a, buai tur kan tam lutuk zawk. Survival of the fittest tih ringawt kan kalsan a hun tawh, Competitive han san tawh zia te hi aw!! Thiamna leh hmasawnna hi a zuan in a zung tak meuh a ni, Entirnan, College/ institute tha chin a Economics la tur ringawt pawhin 95% hmuh pawh hian beisei tih san ringawt pawh a theih tawh loh. Chutiang bawkin Competitor tha tha an tam lutuk Hna chungchang ah ringawt pawh. A hminga Degree neih ringawt pawh hi a tawk lo, eng emaw ber ah thiam bik (professional) neih loh chuan engmah kan ni chuang lo..Kan khawvel hi mahni khua ah leh Mizoram ah ringawt atawp a nih chuan, dinchhuahna leh hmasawnna chu kan hlat tial tial tihna a ni, beisei ngam chi pawh a ni lo. kan harhchhuah a hun tawh takzet e.

A thupui atang ka va peng thui ta em! A thuhmahrui ah a tawp mai dawn, kuang lo nawr ah min lo ngai lo la, A thupui ah- Mizoram, ka ram, ka pianna, ka seilenna ah ka haw tur hi ka va lawm em! Kumpui linglet takmeuh a, hah thi kul a, ka ram neihchhun tana hreawm ka lo tawrhna te hian, beiseina nung a par chhuah tir dawn ta em ni! Kha chen ka lo chhuahsan tawh che a aw, nang Mizoram, tunah i fa hi min lo lawm dawn lovem ni?

(Ka blog hi hna tul vang leh eng eng emaw a awm vang hian, tun hnu hian ka update tha thei lova, chu mai piah lam ah ka hul ema a, ziah tur ka haihchham em a ni; A dera min hlutpui tute chungah min hriatthiam hram ka ngen e.. Post thar tha tak tak in nei a, han comment tur chuan, kei ngei pawh ka blog ah hian ka lut thei ta meuh lo a, ka comment thei ta lo che u a, pawi ka ti takzet a ni e. Thenkhat tan chuan a ho viau mai thei, mahse! Khawi hmunah pawh awm ila, Mizoram tluk a nuam a awm chuang em ni?. Kar leh mai a haw tur ka nia, engtia rei nge ka awm dawn ka hre lo, ka blog pawh hi ka update tha thei lo mai thei a ni… In ngaihawm dawn mange aw..)

Read more »

Sipai Boot : II na

A chhunzawmna

Thuamtea Khawlhring

Nula try nan hian thil te lua a awm thei lo. Kutzungtang han tihchet dan te leh kuhva thial dan chenin a pawimawh vek. Chumi zana U Chheuva petromax khai pawh chuan a zan dang zawng aiin a uluk a, Biak in liang chung lama a han pawt chho te chu a zei kher mai. A khai kan hma hian vawi 20 chiah a pump leh phawt tih hi sawi angai lo. In then miah lovin a khai kang a, ban pahnih inkara a khaina hrui inthlunna herh vir theih a han herh vir vel te chu a bu ang thlap a ni. Rozuali thutna hnu, ni e, tawngkam danga sawi chuan, a mawng thianghlim a nghahna hnu chu a han thlir vung vung a, a hrawk bawk a pial rulh a. Zaninah te hian khawngah tak thu leh ang maw?

Inkhawm dar a vuak tan chiah chuan Biak In chowkidar Aibila chu a dan pangaiin a lo lut hnuang hnuang a, a thaw hlui hlui a. Dar ri vu vu karah chuan U Chheuve chu a rawn pan a, “I ti lawmawm thin hle mai, tang te te !” tiin mei nei takin a then thu a. Bila te lai laiin chutia an han ti ve ta chu U Chheuva thin a thawk teuh kher mai. A han tihdanah chuan mikhual nula an awm apianga petromax chhi thinah leh dar vaw thinah a puh niin a ngaih theih a, huatthlala tak a ni! Tih emah chuan, mikhual an awm laia a dar vuak hnuhnun ber tum kha kum tir lam, sikul tan hma daih tawh kha a ni a, tunah chuan vaimim te pawh a thar tawh asin! Mikhual nula awm apianga dar vuak chuh a ni awzawng lo! Khang lai phei kha chuan sipai boot pawh a la nei hlei nem.

Inkhawm chu an tan ta. Rozuali pawh a changtunu niawm rengin a hnuhnung pawhah a rawn lut a, a ngaia riang vala hi a va dawn lo em! Puan dang a rawn bih, kawkpui zikziak nge lenbuang thuam tih U Chheuve chuan a hre hrang chiah lo. A han pen dan te reng reng chu, hmeichhia pen dan niawm tak hi a ni bik a, a kal zawnga a mawngbawr han insiksawi vel te chu thlawhbawk tournament-a inchuh tham a ni! A han thu ve ta a, an thutna tlar, thutthleng upa tawh tak pawh chu a duhawm thar ngawih ngawih a. Chhei, a kun ta! A biang mam paw thar mai chu a beksam kir lek lek chuan a khuh a, chum dum kara thla chhuak ang mai hian a khuh bak chu a var paw pheu mai a. Ni, a tawngtai a ni! Zanin zet zawng a tan hun danglam ani dawn, theihnghilh tum mahse a hre reng thin ang.

An Upa chhuanvawr Upa Kawla thu sawi chu kan U chheuva’n a hre mumal lo chu dem theih a ni lo. Rualpuite fa lehchhawng te pawh tu leh fa nen an inkai kawi duah duah tawh a, mamawhna hi a sang lutuk tawh, a sovin a so bulh bulh a ni ber mai! Sibudar Thangliana’n a hetih hun khera sipai boot a rochuntir hian awmzia a nei ngei dawn. Tih emah chuan Rozuali te chu khaw khat nula hmeltha leh khual kai chin kha an ni ve a, silipar sen hrui chat tawh nena khawih lunglen mai mai mi an ni bik lo. Sipai boot thar tha veng vawng erawh chuan kori a tu ngei dawn tih a lang reng tawh a, Pu Dopherha parandi coat hawh tur awm lo mahse a pawi thui lovang.

Petromax lah chu U Chheva rilru hre miah lovin a eng nual nual mai a. Han chhe der vel se, han alh eng deuh phut phut se, Rozuali te hma awl zau laiah ngei chuan U Chheuva’n han siam tha vel se; a phung sahmim nen lam chuan han thlak kual vel se, han pump leh zeih zeih mai sela! Tlangval naran lo tak a ni tih hi Rozuali chuan a hriat ngei ngei a ngai tlat. Le, Rozuali te khua chuan hla an rem dawn ta. Mipui hmaah Pulpit bulah an ding chhuak a, zaipawl hruaitu chuan a ‘doh’ vang vang mai. Rozuali pawh tlar hma laitaah chuan a ding tai tek mai a, U Chheuva thin chu a phut dut dut a. An han zai tan dawn a, “Jordan lui…….” an ti hman chiah a, chung lam petromax chu a alh ta phut mai le!

Golden chance!!

U Chheuva inperhtho lai chu tumahin an hre lova, amah ngei pawhin a hre lo! Petromax inkhaina hrui herh vir hniam tur chuan tlar hnunglama a inherh virna invuahna va pan a ngai a, a va herh hniam hmasak chuan Rozuali te hmaa petromax la thlatu dinhmun ropui tak chu a chang pha lovang. Chuvangin, petromax khaina zawn, Rozuali te hmaah chuan thli thaw aia chakin a tek phei a, chowkidar Bila chu petromax khaina herh hniam turin a han vai a. Zaizira Bila a han be vel pawh a zei ngang mai. Rozuali te conductor Thianga solfa vai aiin a ennawm zawk hial awm e!

Petromax a rawn chhuk thla nual nual a, dingdihlip tak meuh hian U Chheuva chuan a lo ban a. A han la thla a, Rozuali ke bulah ngei chuan a han nghat a, a chesual tawh dawn lo reng rengs! Mahse, beisei loh lam atangin thil pawi a thleng ta tlat mai. Chu Biak In boruak reh thuap mai hnuaiah chuan Bila chuan petromax chu a rawn chuhpui ta tlat. Mi huihphai lam a lo ni vei nen, mikhual nula hmeltha hmaa han intihvai tingtang vel a chak pheng chuan, “Thawi, theima pump! Lo thawih ve thuh” a rawn ti ta tlat mai. Upa Lalbiaka chu a thuthmunah chuan pawiti takin a lo chek hlak a, mikhual hmaah an khawtlang an mualpho ngei dawn mai. Thuhriltu Upa Kawla pawh pulit tlang atang chuan a rawn dak duk duk a. Kohhran Secretary chu a han mitmei zoh a. Mikhualho lah chu laklawh fahran hian an ding thap mai a, an hmaah chuan U Chheuva leh Bila chu an nak a innek ngat ngat mai bawk a.

Rozuali ke thiah no chek mai ngheng renga petromax han pump zeih zeih a lo chak vei nen, mipui hmaah chuan BIla chu han hnial chi ani mang silova, a thutnaa a kir leh dawn lahin a la hun si lo, a lai kual vel vek mai a. A tlawmngai chuan, “Lo khawih lo mai rawh, nang aiin ka thiam zawk” tiin Bila beng bulah chuan a han ti sur sur a, ani lah chuan a nghawk doh suh chauh mai a. Bila lah chu ami zawng laiah a tuan muang chi, thil engmah han thiam nal thlip thlep lo chi a lo ni a; petromax pawh chu han tih nun that leh mai tur a nih laiin a ti thi ta tak tak a, a thim thup ta mai a. A tawng an hre pha vek tih hre miah lovin U Chheuva chuan Bila beng bulah chuan, “kha, ka tih reng kha! Lo khawih tawh suh” a han ti bul bul a. A beng hi a that chiah loh avangin zawiteiin a sawi theih si loh a, Rozuali te chu an lo nei tet tet a. Chutia a’n thim takah chuah rang fahranin U Chheva chuan safety match Horse Head ngei mai chu a’n phawrh a, vawi thum a tlawlh hnuah a chhi kai thei ta hram a. Rozuali ke bulah chuan a pump ta zeih zeih mai a ni.

Khai kan a hun, a eng tha ta. Hun a khaihlak rei tawh avangin a khai chhohna hrui herh tur chuan hmanhmawh takin U Chheuva chu a boot ropui nen chuan a han pen chhuak a, mahse tum thuhmun Bila nen chuan de chhuai khawp hian an han intauh leh ta pek a! Tukkhhum chul vat vat pah chuan U Chheuva chuan Rozuali chu a va melh a, a rumol humna kuta a hmui hup pahin hnuailam melh hian a lo kun a, a nui ngei a ni! A khai chhoh hna Bila a kian ta chu a tifuh ngei mai, avang chu Bila hmanhmawh lutuk chuan a khai then a, zaipawl chungah chuan a inthen nulh nulh mai a, mi chu an nui huk huk a. Mi nuih a zat laklawh tlat tawh avangin zaipawl rawngbawlna pawh a tla na dawn lova, petromax inthen chu man din ngei a ngai. Chhuat atang chuan ban phak rual ni hek lo, Bila chuan zaipawl zai lai hmaah chuan khuangpui hunna chu a khuang chawpin a hnuk phei a, a lawn ta ur ur mai a. Pa tawi thau nelh nulh a nih avangin a ban pha mai si lova, boruakah chuan a invai vuat vuat a. In sum theih zawhzai ni tawh hek lo, mipui chu an nui hluah hluah a, Rozuali te zaipawl zai lai pawh chu zai tha thei aram an awm lo. Petromax a han man chiah chuan a dinna khuangpui chu a dahna atangin a tla ta si a. Saprano satute chu a bawh eng ta dual mai a, a khawlo zo ta! Chekah chekah!!

Tihdan phung pangaiin inkhawm banah chuan Upa Sawibuta inah an han zaikhawm leh te te a, U Chheva last chance a ni ta, Now or never zah fakah lu em a chhum lovang tiin Rozuali khuap khur chuan a hnungah chiah a thu a, a sam chhawllengin a rawn zah thawh thuak chang te chuan a lungphu a chawl lo chauh zel a, a intipachang hram hram a. Zai karlaka thingpui in lai chuan, “Rozual, naktukah em ni in hawn dawn” a han ti ve thuai ta mai a! Chu thu sawi chhuak tura a in-ap nasat zia chu thangthar chuan an hrethiam pha lovang. Rozuali chu a sam chhawlleng han thing pah chuan mawi takin a rawn lehhawi a, “Awi, U Chheuva a ni reng mai! I lo zaikhawm ve ani maw?” nui har har chungin a han ti a. Kan u thin chu a phu dut dut a, “Engtin nge ka hming te i lo hriat ve a?” a han ti tham chhul a, Rozuali chuan, “Nang ang milar te chu kan hre zel alawm. Banah min thlah haw rawh aw, ka thlen in te’n chhangban an chum a nia” a han ti a, an zai tan leh ta a.

Chhei kha raw, kan tih reng kha! A nghing a awm tlat! Biak in chhunga sipai boot hnum tle hlarh mai a hmuh atang khan he nula hi a pangai tawh lo tlat! Chawhnu lam khan lungdawha han pawh penna hun phei chu awm se, tunah hian kohhranin an phuar tawh ngei ang! Chatuan tluka rei an zai leh hnu chuan Kohhran chairman a tawngtai a, an bang ta. Khawkhat nula hmeltha zui haw tur, a phalna ngeia zui haw tur a ni bawk a, U Chheuva chu vanrang chum karah a leng tak meuh a. Rilru fim pawh a pu thei lo chuan kawng lai thimtham zinga bawng bawk chu a boot lawk pui mai chuan a’n chhuih thawr a, an bawngpui rai lai lah lo ni rengin! A note a pet hlum em lovang chu maw!

Rozuali thlen in pawh an hnaih ta, chhangban chhum rim a nam chak chak mai. Tlaipui khaw zotlang sanga zothlifim lengvel karah Rozuali powder rim leh chhangban chhum rim han inpawlh kual vel hip luh chu dam sawng sawngna tham a ni. Thlen in te pawh an lo la meng a, tlangval tlawmngai U Chheuva chuan pathlang lam, tui hunna lamah chuan inthlahrung tak chung leh nuam ti ru tak chung siin a pan vei dun dun a. Thlenin nu chuan, “Awi, U Chheuva lah ni rengin! i va han fel em em ve? Mei engah hian lo thu rawh, kha lamah kha chuan kal suh, chhuat kha a mawih a nia” a lo ti sawk sawk a. A sawi zo chiaha tui um hunna bul maurap chhuat mawih tawh chu U Chheuve sipai boot lawk pui mai chuan a rap tliak tak tak a, a tla hawlh ta rup mai a.

Tuium an rawn tlu a, in man din a tum chuan an bungbel dahna chhuar derdep tak chu a vai thlu pah bawk a, a ri ta rum rum mai a. Bungbel leh tuium darh nuai mai karah chuan kan U Chheuva chu rem lo tak mai hian zau fahranin a kar phun a, a ke dinglam chu a tang tlat mai a. A tanhmun han siam rem mai tur chuan a ke chu a tiche thei si lova, um elh zet mai chuan chhuat laiah chuan a her tui mai a. A kar nasat em avang chuan a kekawr kap a’n tet zui a, kekawrte chu ha ve bawk mahse, a khel lama kaihna pawhfan chu a lo rule tawh a, a thil thuhruk chu a rawn uai ta thuah thuah mai a. Mei eng chhawng zawng takin a kar suah mai si a, lang lo tura thuhruk reng a awm lo! Rozuali leh thlen in nu chu an mangang em em mai a, pa ber leng an ko chul mai a. Chhuat mau za tliak leh thawmmawl ban thel mam loh inkawkalh vel karah chuan a sipai boot lianpui mai chu a tang tlat mai a, a va han ti mualpho nasa tehreng em!

Thlen in pa leh Rozuali te khaw tlangval puihnain an inhnuk chhuak thei ta hram a, an chhangban erawh zawng lem a har deuh a ni.

Chu boot zet chu!!

Read more »

Sipai Boot

Thuamtea Khawlhring

Phung tuibur hi engnge ni ang tih ka ngaihtuah thin a, tun thleng hian ka la hre chiah lo. Chutiang bawkin sipai boot hi eng ber nge niang tih ka ngaihtuah fova, khawvel-in eng ber hi nge sipai boot nia a pawm tih te, Chamber's Dictionary-in engtinnge a hrilhfiah tih te, Hav. Pakunga Lushai-in engtin nge a sawi ve tih pawh ka hre chiah lo. Keimah hian pawmdan erawh ka nei ve a, ka pawm dan hi mi pawm dan anih loh pawhin ka vui chuang lova, ka buai chuang hek lo. Ka pawm ve dan chuan sipai boot hi chi thum a awma- (1.) A pakhatna chu puan chhah deuh tak, a rawng pawh a hring ani. A hnuai chu thelret chhah pui ani a, a rawng pawh a sang a, ngalrek thleng lai ani. Hrui sei tak anei a, thil fe a ngai. A tak hi savun ni loin puan a nih tlat avangin a zawi deuh a, ka dah sang vak lo (2.) A pahnihna chu, sipai boot han tih lemah puanpheikhawk sen ang chi kha a ni a, sipai boot-ah rau rau pawh a nep ber chi ani. Sipaiin an dawn ve thin avangin 'boot' kan han ti ve mai a, a awmnem hle. (3) A pathumna hi a ropui ber chu a ni. Savun dum a siam, khauh khawng tha tak mai ani a, a hnuai pawh thir kual khauh tak ain vuah ruih mai a, a rit hle. A rawng sang ani a, chawn thleng laia asang pawh ani thei. A hrui lah chu a han sei mai mai khawp a, ka pu bengchheta hnang hlai chen zet a ni. A thilna tur kua lah chu a tlep hian a tlep tuar mai a, sechal ek han chhuih thawih nan pawh duhthusam a ni. 

Chutiang taka pheikhawk ropui chu keini ang Tlaipui za nufa khaw naupang tan chuan mumang lamah tih mai loh chuan a hmuha han hmuh mi rual ani lova, a neiha neih phei chu suangtuah chi pawh a ni lo. Sipai, darfeng val ngei maiin thuam famkim nena an han bun khup mai hi chu a ropui dan chu namen lo tak ani a, a thawm a ring si, khawvel hi an ngam hliah hliah mai a ni. Pu Chhingtawia huan mawng hel hling hmun kan kal ngam lohna te chu sipa boot dum nena chil pherh chakin kan suangtuah fova, kan sava vehna leh kan daivahna ilo vela thingsemim hling fahran pawh a ninawm zozai lutuk deuh em a, sipai boot nena han rawt siah siah kan chak ngawih ngawih thin. 

Minaran neih phak loh sipai boot rawng sang, a suihna inphan tuak mai leh a thilna kaw tlep tuarh mai, sipai chhuti Pu Thangliana'n kan khuaa a rawn bun haw chiah kha chu damchhunga theihnghilh chi ani tawh lo. A kalna apiang ah naupang chuan kan zui duh dul mai a, Artan veng chirhdiak a han rap pherh vel leh kawng kama a hniak lang kulh kulh mai te chu kan thlir ning thei lova, Pu Hrangchuha se ek khawro a han vei chhuih phei kha chu aw, a leng thui vawn vawn teh e! Nula Lalkaii te sumhmuna mau ram a han rap tliak beih mai a, kan football neihchhun Kapsanga vawk phing chu a vawi khat chhuihah a pet keh bawk a, chu pheikhawk ropui zet chuan kan nunphung a thlak danglam hneh hle!

Kha pheikhawk namenlo tak mai kha Tlaipui khaw tlangval senoir U Chheuva'n engtinnge a lo neih ve teh khiah tih kha ka hre reng tawh lo. Engpawh ni se, chu a sipai boot turu tak mai chu Sibudar Thangliana'n a kal bopui leh ta lo kha kan khaw tan chuan malsawmna ropui tak zawng a ni.

Sunday tukah Hotunu Rinpuii te pheikhawk nawhna hawh chawpin uluk tawkin a han khuih fai a, dawrkai Vawma siai dum a bat ngei mai chu ngun fahranin a a han hnawih a. Thlan tla phunga a han nawm meuh chuan namenin a tle tawh lova, a khaw pumin darthlalang atan kan hmang lo chauh a ni! Miin raldo nana an pheikhawk vohbik ngei mai bun chuan Biak in kawng a rawn chhim zawh ngut ngut mai a, khaw thenawm kohhran thalai pawl in min lo tlawh tuk a ni lehzel chuan a tiphur kher mai.

Mikhual nula hmuh theih ngei turin tlar hmaah a han fuk pui vang mai a, uluk tawkin bawp a'n khawkherh a, ke a phut hleuh hleuh mai a. A lo lut lam a per ring lutuk chu Chairman-in sawi chhuak hial mahse pawi ati lo. Tlangval leng rei tiin khaw thenawm lam lamah nen a thang vei maw? Mikhual nula hmeltha Rozuali te ho khan han en ula, a pheikhawk atang ngawt pawh hian a duh duh thing thei a ni tih zawng in chiang thawt lo'm ni?  A hmuh zawh loh vang ni lovin a duh tui vang zawk asin. Thingrem zai thei an neih leh neih loh pawh in hre chai em ni? A putea pawhin Dharmendra a hmu tawh mai thei asin!

Ni, U Chheuva hian thangkhat lian vawi tam a lo thlir liam ta. Thangthar an lo tuai a, nimin lawka naupang inkawibah thinte kha nula an rawn ni a, tuikhur kawngah an rawn nui tak awr awr a. An nui ri a reh fel chauh tihin pasal an um nghal a, kawng kawia an rawn lan leh meuh chuan chhangchhenu an lo ni tawh mai thin. He hun inthlakthleng hi U Chheuva chuan vawi tam a lo hmu tawh. Chhuan khat an vul chhung hi rei lo a ti a, a inrin ve hmain a liam leh thin

Tih emah chuan hmu zo lo a ni bik hlei nem! Siampari te nulat laia Damveng nula kha chuan a tum ve hle kha maw. Tunah chuan an fate fa leh chhawng pawh an lo nula leh tawh a, an bulah an pite chanchin a sawi a sawi duh lo mai mai a lawm! Tlangval invawn thianghlim duh mi chu ni lo se Tlangnuam rama thingse buk hnuaiah khan leilung a lo her danglam ve tawh ngei ang. Ni, khami tuma nula thingphur a zui kha chuan a mitmei a hmuh hle kha maw, a uang duh lo mai mai alawm! Tihtak emah chuan, theikelek rah lawh saktu pawh kha tudang an ni hlei nem!

Inkhawm banah pheikhawk ropui nen an mikhual nula zaikhawmmna ina a han a chhawm lut pawh chu teuh ve ther ther tak a ni! Sipaia tangte chauh in an neih theih pheikhawk ropui tak mai bun pha chin chu mikhual nula lungfing chinte chuan dah hniam thuai hek lo, Biak in chhunga a rawn det dan sawr sawr pawh khan a rinna a tiderthawng tawh reng a; chutia a powder diak inhnawih Afghan Snow rim hre pha hial khawpa an inhnim hnai ta mai pawh chu a mak hlei nem! A mawihawih zawng pha chin a lo nih ve tawh avangin zaikhawmna inah pawh chuan a thutpui duh lo ani mai a, a ep lam kilkhatah a ngaih la tawk tur chauhin a inthiat a, mi karah an indet chhawk zek zek mai a ni. Zaikhawm banah hun thawl a awm phawt chuan kawtchhuah lungdawh lamah rik pui sun sun mai tur, Engnge ni vei, hei leh chen a lo in vawng thianghlim tawh a, miin an hmusit phah tlat, vawi khat na reng reng chu chetsual ve rap pawh a pawi lo! Saw, a rawn melh dan atang sawn a tlawm sa reng alawm!

Dim miah suh Chheuva, a hmeichhia zawk mahina cho te chu phung sawh hlawih hlawih mai rawh le. Thangthar engmah hre mang lo te hian an nuihsawh vel che maw? Hmana thinglukam pakhat vanga i mualphona kha tunah chuan a hlaihkhuhna tur hun tha a rawn her chhuak ngei dawn e. Kohhran mitmei i ven vang chauha nula thingphur tlawm duh lo kha i ni a, chetsual ai chuan thinglukham sah i thlang ta zawk kha a ni a, nula laka i zei loh vang ani hlei nem! He mikhual nula hi i tana  bel ruat ngei a ni, he nu avanga kohhran phuar nih chu ana hauh lovang. Fa lu i hloh takngial dawn e!

E khai, ke hmawrah sipa boot a han invuah zet chuan ngaihtuahna pawh a chuan a hnuai ruih mai maw? Zaikhawm boruak pawh a heng zo vek mai! Nula rilru hneh dan hi chu a duh phawt chuan a thiam alawm! Upa Nikhupa te meuh pawhin, “Chheuva meuh han chetsual ve ta chu, a nulain a zir hle ani ang e” tiin an rawn thiam tho dawn. Mipa a nihzia hi khawvelin a hre dawn alawm.

Pathian fak hla saa tui taka mi an zai laia chutiang hlir alo ngaihtuahna chhan chu sipai boot vang vek a ni!

Zaikhawm chu an bang ta ngei mai. Mahse lungdawh lama inpawh mualpho a la rem rih lo ani ang, U Chheuva duh aiin an bang tlai ta tlat a, mikhual nula khalh falna hun a awm ta lo. Mikhual nulate thlenna veng lam meizial a tui thar thung a, an haw tur thlah a tul vang pawh ni chuang lovin meizial lei a ngai tlat. Mahse, nula rual khat chu pawh nghal bawrh bawrh a rem lo. Tum loh hmel takin an hnungah a zui hrut hrut a, a chang lahin a han kal pel ut ut thin bawk a. A han be dawn zuau zuau thin a, a han dir uih uih a, a hrawk atangin a rawn ri chhuak thei lo leh thin. A zah vang leh a zei loh vang ani lo. A la hun lo a ni zawk. Hmeichhia chu an cheng deh thiam a ngai.

Be lovin a chhuah takngial dawn a, an thlenna veng an thleng tawh tlat. Khawnge, tlangval; lungfing pangai ani lom ni, a chet a hun tlat. An hnung atang chuan a han dir uih a, “Rozual….” A ti hman chauh a, fur ruahin a nan huh lung no nal chu a rap pial palh a, a boot ropui a la hmang thiam chiah lo nen, a petek nuk a, tuihawk chu a rap per ta chuai mai a. Rozuali puan thulkhung bih lai chu a berh phung a, U Chheuva chuan a melh run run mai a. Zak tura ngaih chu a ni. A sipai boot vang bawk.

Rozuali te’n an pen zawhsan hnu chuan khaw hmawr favai zingah a va zung to to a, a han inthing nuk nuk a, hniak pherh vungin zanriah bawp man hman turin a haw ta a, A ka chhunga maian bai leh buhchangrum a hnawh luh lai chuan tuihawk a dai per mikhual nula kha a ngaihtuah roh roh a, a hmulthi a ding sung sung a. Biakin petromax chu miin an chhit khalh ang tih mawlh a hlau ber a, sipai boot thar bun chunga Biak in chhunga petromax khai luh chu pui dawn riau in a hria a ni. A kham thuai a, mei engah chuan a sipai boot chu a han thlek a, tap kawmah chuan a han per tlut tlut a. Kam a thuah puat a, Upa Lalbiaka inah petromax la turin a tek chhuak ta a ni.

Sipai boot hian thil a va ti thei em! Mihring nunah hian thil chhia leh tha a va han thleng hnem thei em! A buntu-a zir alo ni!

Entirnan, Kapzova te ang ke hmawra invuah chu ni se, Sachhun kawng an zawhpui kumtluan rinngawt ang a, khawilam mikhual nula hmeltha in khaw member a tih pun phah lovang. Lo vah nan te, buh phurh nan te, lui kal nan te hial pawh an hmang ang a, a ropuizia leh a chungnunzia te ngaihtuah miah lovin zo kawng chhuk-chhoah an rap sawk sawk anga, rei a daih lovang. Tiau lui dung an zawhpui thin a nih vaih phei chuan karlovah a savun chuan a tuar mai dawn a ni. Tui dai pui atan rit an ti deuh a nih pawhin an nghawngah an han awrh ngei ang a, nghawnga awrh chung chuan Tiau lui lipui dum ngun mai chu hleuh kaipuite an han tum ve khanglang ang a, an tla hlum mai ang. An thih phei chuan chuan thil zawng zawng a buai zo ang a, a ruang an zawnna lamah a sipai boot ropui ber chu an tibo emaw a ni ang a, thil a khawlo zo ang. Burma sumdawngin a khingkhat chauh emaw kha vaukam chirh zingah an han chhar ngei anga, hralh sumah pawh hlawk tham a nih dawn avangin a khing lehlam zawngin Tiau lui suar chhia zawng zawng an suar tluan ang a, an tla hlum leh reu reu ang e! Chuvangin, Kapzova te ang chuan bun ve lo law law mai rawh se.

U Chheuva han er pha ve deuh ber chu Hrangliana te lah a buna bun chi an ni silo! A kephah te reng mai chu a malsawm lo zawng hian a kak thu mai a, feh kawngah pawh a hniak hi tumah in an hai lo reng reng a ni, A sam te lah chu a tawngpawng zuah ve nghuang ringawt a, a bal em em bawk. U Chheuva te chuan awmze ril tak neiin asin an zuah ni! Aizawl-a a thianpa, Henry Khiangte chu Beatles zai te pawh a lo ngaithla ve tawh leh an lem te pawh lo hmu ve tawh a ni a. John Lenon-a sam sei lai hre pha ngat a nih bakah an hla thenkhat te pawh sa ve thei sawlh sawlh anih avanga, a sam chu zuah sei ve ngat a ni a. Henry-a sam a sei chhung chuan U Chheuva sam pawh a sei tur a ni ringawt, an inzawmmna a ril em! An naupan laia Pu Thawnga fu an ruk thin lai phei kha chu rei tak a ni tawh. Tih mai mai ani lo.

Henry pawh hi Beatles’ shoe leh kekawr zuih nena Thakthing tlang vela lo tawlh thlu ve zat zat tawh kha ani a, mi namai ani hlei nem! Aizawla a luh tirh chuan Lalrumvunga kha a ni ve ringawt a, tu khaw khain ka ui ka ar an ti lo. Pa lungleng thei ani a, Aizawl nula han khuaikhem tur chuan sap hming neih a ngai tih kar lovah a hrethiam thuai a, Modern a ngai tlat a ni.  Tichuan, sap hming hrang hrang a han pu chin a, a tir berah chuan Stefano a han inti phawt a. Zei phah dawn riauvin a inhria a, in hmeh hleiin a in hre bawk. Mahse vanduaithlak takin tlangval lar tak pakhat hming chiah mai a lo ni a, thlak a ngai leh ta. A thawnthubu chhiar ami Clayburn tih chu a pui riauin a hria a, a han pu leh a. Clayburn LR Vunga a inti mai thin a, chu hming pu chuan a then kual nasa ve hle a ni. Mahse aizawl nula pakhatin Clayburn tih chu Sikulpuikawnah alo nuihpui tak nghek nghek avangin thlak alo tul leh ta. Alfred CH Sailo, Dariano M Pudaite, Sosono L Hmar  tih vel a put kual tak chiam hnuah, a mumang lamah Henry  tih a lo nih avangin a zing tho chuan Henry H Khiangte tih chu a inphuah ta a ni. A thlak leh dawn em kan hre lo. Sipai boot nen a va inhlat ta em!


(A chhunzawmna a awm ang)

Read more »