Awi karei, Lucknow !

Ruangla Sipai kan tih mai, Army Medical Corps-ah a nawlpuiin kan tlangvalte an lut a, an hmunpui leh training-na Lucknow lam chu kan hawi thup a, rinnaa kan khawpui lar ber Jerusalem pawh hun engemaw chen chu a lan daih a ni. Khaw lama an kalsan an chhungte leh bialnuten an tana hualhimna kut leh malsawmna dila, chung lam an tihbuai apianga khaw hming an sam mathlawn loh chu Lucknow a ni. Abikin, nulaho rilruah a khat liam a. An inchhuih palh emaw, thil an tihpalh reng reng emaw, buh den khaihlak lai emaw chang hian tawng chang laknaah 'Awi, ka rei! Lucknow' an tih thin avangin, 

A thang thui kher mang e, tlang tinah,

Siali lungleng tuar zo lo mangang chuan in,

"Awi ka rei ! Lucknow" an lo ti e

tih hlate hi tlangvalten an lo phuah ta hial a ni. Nula te lah diau duh hek suh. Zahte chu pumah ngaiin,

Thiani, kei zawngin ka tuar zo lo,

Ka vulmawi'an zaral min relsan si a;

'Awi karei ! Lucknow' tih ka bang dawn lo

tiin, tlang rel pawh dawn chang lovin, an kuk ker ker mai a ni. Chu chang a ni hlei nem. Kumpinu lalram chhana lo zuang chhuak tura thu chhuahtu Aizawl Bawrhsap thleng chu mawh puhin,

Bawrhsap lungliana'n i rel sual e,

Chhailai chaltuai sam ang ka then tur reng hi,

Ka dawn hian lung reng a awi thei lo

tiin a thla an hauva, an chhuahchhal hial a ni.

Sipaia kal tate chuan Lucknow khawpui an zukthleng a le ! In sang pui pui, insi khup mai leh Station-a rel kawng thlur tam tak kanna tura thir leilawn sang an dawh thuahte chu ropui tiin an thlir vel a. Kil khatah khuaibu an han hmu a,

Hei hi maw ni, Lucknow khawpui chu!

Ka hawi vel a lei sangpui kailawn zawng hi,

Kham khuaipui lawi nan an mawi reng e

tiin an zinga pakhat chuan a han chham chhuak a, rel station chhuat mam laiah chuan an han chai ta suau suau mai a. Chutah, an hruaitu Gurkhali bel hnih bel chuan, "Nangmahni Lusei, hla sa mai mai, Sipai chu hetianga lam tur nilo maw le, Kal chu hun tawh maw le" a han ti that that a, an kal leh ta chauh a ni.

Zopa zuauna ber chu minu lakah a ni. Kan hla atanga teh phei chuan khawvela tahbelh ber hnam zinga mi kan ni ngei ang. Aizawl an chhuahsan dawnin sipai an lak tharte chu a pawl pawla thenin pawl khat zel hruaitu atan Mizo tawng hria Gurkhali bel hnih bel an dah zel a. An chhuah dawnin thenkhat chu an bialnuten an rawn thlah ngei a. Tlangval pakhat chu a bialnu nen indin chilhin a tap pur mai a. An hruaitu Gurkhali chuan, "Nangni Lushai tlangval ni lo maw? Tap reng mai, Chalaw, kal tur chu ni maw le" a han ti a. A bul lawk a tlangval dang, inhnit hlawp hlawp lam chu hawiin, "Nang pawh, Lushai kha, lunglen thu sawi zo tawh maw? Lo kal la, ni chu sang tawh, kal hun ni tawh maw le" a han ti bawk a, an chhuak thei ta chauh a ni. Pa lohna zawngah chuan Zopate chu pa lo tak tak kan ni ! Tap reng mai.

Lucknow-ah rawngrut training an han tan a, lu an han meh kawlhsak a, Boot rit tak an buntir a, dal leh roti in an han chawm a, lam an zirtir a, thih thlenga ram tan leh chhana huaisen taka hmelmate do turin an han fah a. Mahse, an lunglenna erawh dawi at leh meh kawlhsak thei ani si lo. Lunglen vang ringawt leh lehkhathawm an ziah duh vang ringawtin thenkhat chu damlo derin, chawlh an dil thin a. Tlangval pakhat lungleng pawhin daktor a va rawn a, damdawi a lo chawh a, mahse a dampui lem lo ani ang,

An sawi Lucknow zawng kan thkeng ta e

Lunglen vangin Daktor babu ka rawn e,

Tarpintel min pe, ka dam thei lo

tiin a phuah hial a ni. 'Tarpintel' hi Saptawnga 'turpentine' an tih hi a ni. Tarpintel a zun ngai lunglen chul dam tum chu, a khawlh bawk ani.

An han awm rei deuh hnu chuan mi ningkhawng leh tawngte pawh an rawn hre ve deuh deuh a. A huhovin an leng chhuak ziah thin a. Bialnute hnudawm (brassiere) tur leia an bazar chang chu an hmuhnawm thin hle awm e. A zuartuten an size duh zat an zawt ngei a, an hre lo ngei bawk a. A len dan awma an hriat angin kut zungtang bawrin boruak an han hum a, thil zuartute pawhin a tawk awm chu an lo hre ve mai zel ani, an ti. Tlangval pakhat pawhin ni lengin a ngaihzawng zungbun tur a zawng a, a tawk awm a hmu meuh ta lova, beidawng takin ti hian hla a phuah ta ringawt mai a ni.

An sawi Lucknow zawng kan thleng ta e,

Thangngovi khan ngun kual min chah zuk nia le !

A bun tawk ngun kual a vang mang e

tiin

Lucknow leh hmun  hrang hranga training la te hi ram hrang hrangah kal chhuakin, hming tha tak tak an chher a. A then chuan Singapore an han thleng a, Japan ho man zingah tel vein, Netaji Subhas Chandra Bose hruai INA sipaia rawn tang haw tate pawh an awm nual a ni. A then erawh North Africa leh Middle East ram hrang hrangah an kal a, ke ngeiin Ran thianghlim an zuk rap a. A tam ber zawk erawh Burma ramah Japan umin kan hnam tan hming chhuanawm an chher a, khawvel history ral ngai lo tur hniakhnu zahawm tak an hnutchhiah a. Hnehna changte an lo kir leh chuan, sum leh pai leh thiamna chi hrang hrang an rawn hawnte chu hmangin kan ram leh hnam thut an rem a, eizawnna ngelnghet zawk mi tam takin an din phah ta a ni. Zoram chhak leh thlanga kan dinhmun zel kan thlir chuan, Kum 50 chhunga ram leh hnam hruaitu pawimawhte zinga a tam ber leh thu leh hla leh simdawnna lama kan mi chhuanvawr tam tak chu sipai bang an ni.

Thu thenkhat lakna :

Zoram Khawvel 7

© L. Keivom, 2001

MCL Publications

Khatla, Aizawl